پنجاب کے گورنر چوہدری محمد سرورنے کہا ہے کہ پاکستان میں امن برقرار رکھنے کے لیے ہمیں خود کردار ادا کرنا ہوگا۔

تفصیلات کے مطابق گورنر پنجاب چوہدری محمد سرور نے لاہور میں پیر شاہ عنایت قادری کے مزار پر حاضری دی، پھول چڑھائے اور فاتحہ خوانی کی۔

اس موقع پر میڈیا سے گفتگو کرتے ہوئے گورنر پنجاب چوہدری نے کہا کہ مسلمان بحیثیت قوم متحد ہو جائیں تو کشمیر اور فلسطین کے مسلمانوں پر ظلم ختم ہو جائیں گے۔

چوہدری محمد سرور نے یہ بھی  کہا کہ برصغیر پاک و ہند میں اسلام کا پیغام صوفیائے کرام رحمۃ اللّٰہ علیہ نے پہنچایا، رب کے پیاروں نے ہمیشہ انسانیت اور محبت کا درس دیا۔

چوہدری سرور کا کہنا  تھا  کہ انتہا پسندی کے خاتمے کے ساتھ ساتھ ایسے عناصر کا خاتمہ بھی ضروری ہے جو فرقہ واریت اور نفرت کو فروغ دیتے ہیں۔

اپنے بیان میں گورنر پنجاب چوہدری محمد سرور کا مزید کہنا تھا کہ پاکستان انتہا پسندی کے عفریت سے نکلتا جا رہا ہے، پی ایس ایل کے میچز اس کا واضح ثبوت ہیں۔

گورنر پنجاب سے نیپال کی سفیر کی ملاقات

واضح رہے کہ اس سے قبل بھی گورنر پنجاب کی زیر صدارت سوشل ویلفیئر کمیٹی کا اجلاس ہوا تھا جس میں ممبرسوشل کمیٹی سعد نذیر اور دیگر تمام ارکان سوشل ویلفیئر کمیٹی نے شرکت  کی۔

اجلاس   میں پنجاب کی عوام کے مسائل کے حوالے سے بھر پور گفتگو ہوئی اجلا س  کا بنیادی ایجنڈا غریب نوجوان جوڑوں کی شادی کی تقریب کا انعقاد کرنا اور ان کے لئے جہیز کی فراہمی کو ممکن بنانا تھا تاکہ وہ معاشرے کے مفید شہری بن سکیں ۔

دوران  اجلاس  گورنر پنجاب چوہدری سرور نے کہا  تھا کہ سوشل ویلفیئر کمیٹی کی مدد سے عام عوام کے مسائل کے حل کے لئے بھرپور اقدامات اٹھائیں گے۔