پاکستان نے شام کے زلزلہ متاثرین کیلئے میڈیکل اور ریسکیو ٹیمیں روانہ کردی ہیں جس میں امدادی سامان بھی شامل ہے۔

تفصیلات کے مطابق وزیراعظم کی ہدایت پر این ڈی ایم اے نے شام کے زلزلہ متاثرین کیلئے 20 رکنی میڈیکل اور ریسکیو ٹیمیں روانہ کر دی ہے۔

شام کیلئے امدادی وفد، پمز سے 10 ڈاکٹرز جبکہ سی ڈی اے کی 10 رکنی ریسکیو ٹیم پر مشتمل ہے جبکہ ٹیموں کے ہمراہ ریلیف سامان بھی دمشق روانہ کیا گیا ہے۔

یہ بھی پڑھیں: شام زلزلہ، پچاس لاکھ افراد بے گھر ہو سکتے ہیں، اقوام متحدہ

سامان میں 131 سردیوں کے فیملی خیمے اور 3 ہزار966 کلوگرام ادویات شامل ہیں تاہم ریسکیو ٹیم شام کے متاثرہ علاقوں میں اربن سرچ اور ریسکیو آپریشن میں حصہ لے گی۔

شام کے لیے ٹیموں کو وفاقی وزیر سیفران طلحہ محمود اور معاون خصوصی حامد حمید نے رخصت کیا ہے تاہم ریسکیو اور میڈیکل ٹیمیں پی آئ اے چارٹرڈ طیارے بوئنگ 777 کے ذریعے دمشق پہنچیں گی۔

خیال رہے کہ وزیرِ اعظم شہباز شریف کی جانب سے شام کے وزیرِ اعظم حسین آرنوس کو ہر ممکن مدد کی یقین دہانی کروائی تھی۔

وزیراعظم شہباز شریف نے شام کے وزیرِ اعظم حسین آرنوس سے شام میں زلزلے سے جانی اور مالی نقصان پر گہرے دکھ اور افسوس کا اظہار کیا۔

 شہباز شریف نے شامی وزیراعظم کی ہمشیرہ، ان کے گیارہ بچوں، پوتوں اور نواسوں کی ہلاکت پر تعزیت کا اظہار کیا اور ان کی بلندی درجات اور سوگواران کیلئے صبرِ جمیل کی دعا بھی کی۔

 وزیرِ اعظم شہباز شریف نے کہا کہ پاکستان کی حکومت اور عوام قیمتی جانوں کے ضیاع اور املاک کو بڑے پیمانے پر نقصان پر گہرے رنج و غم میں مبتلا ہیں، پاکستان کی طرف سے بہت جلد شام کے زلزلہ زدگان کیلئے امدادی سامان سے بھرے ٹرکوں پر مشتمل قافلہ روانہ کیا جائے گا۔