مسلم لیگ ن کے سینئر رہنما شاہد خاقان عباسی کی سینئر نائب صدر اور چیف آرگنائزر  مریم نواز سے سیکرٹریٹ ماڈل ٹاؤن لاہور میں ملاقات ہوئی۔

ذرائع نے بتایا کہ ملاقات میں مریم نواز نے شاہد خاقان عباسی سے تفصیلی گفتگو کی اور انکے تحفظات دور کرنے کی بھی کوشش کی۔

ذرائع کے مطابق دوران ملاقات مریم نواز نے شاہد خاقان عباسی سے گفتگو کرتے ہوئے کہا کہ میں آپ کی بہن ہوں آپ کی رہنمائی میں پارٹی اور ملک کی ترقی میں اہم کردار ادا کرنا چاہتی ہوں،  پارٹی میری اکیلی کی نہیں نواز شریف کی سربراہی میں سب مل کر پارٹی کیلئے کام کریں گے۔

مریم نواز نے مزید کہا کہ آپ جیسے لیڈر پارٹی کا فخر ہیں اور آپ کی لازوال قربانیوں کو فراموش نہیں کیا جا سکتا۔

ذرائع کا کہنا تھا کہ دوسری جانب شاہد خاقان عباسی نے مریم نواز سے  گفتگو کرتے ہوئے کہا کہ میں نے اپنا سب کچھ مسلم لیگ ن کے وقف کر رکھا ہے، نواز شریف میرے لیڈر ہیں، شہباز شریف کی رہنمائی ہمیشہ میرے ساتھ رہی۔

شاہد خاقان عباسی نے مزید کہا کہ نواز شریف سے محبت ہے اس لئے ن لیگ میں ہوں، ن لیگ میں رہا اور آخری دم تک ن لیگ میں ہی رہوں گا۔

واضح رہے کہ مریم نواز کو اعلیٰ عہدہ دینے کے اگلے دن سابق وزیر اعظم اور مسلم لیگ ن کے سینئر نائب صدر شاہد خاقان عباسی نے پارٹی کے عہدے سے استعفیٰ دے دیا تھا۔

مریم نواز نے خود کو موجودہ حکومت سے الگ قرار دے دیا

علاوہ ازیں حکومتی ناقص کارکردگی اتحادیوں نے ملبہ ایک دوسرے پر گرانا شروع کردیا، مسلم لیگ ن کی چیف آرگنائزر  مریم نواز نے خود کو موجودہ حکومت سے الگ قرار دے دیا۔

ذرائع کے مطابق چیف آرگنائزر مریم نواز کی یوتھ کے نمائندوں سے ملاقات کی اندرونی کہانی بول نیوز سامنے لے آیا۔

یہ بھی پڑھیں: شاہد خاقان عباسی کا مریم نواز کو لیڈر ماننے سے انکار

ذرائع نے بتایا کہ موجودہ وزیر اعظم شہباز شریف ہیں مگر مریم نواز نے ن لیگ کو موجودہ حالات سے بری الزمہ قرار دینے کی کوشش کی۔

ذرائع کا کہنا تھا کہ مریم نواز نے اجلاس میں یوتھ سے گفتگو کرتے ہوئے کہا کہ میں اس حکومت کا حصہ نہیں ہوں، یہ میری حکومت نہیں ہے، اس حکومت کی کار گردگی ن لیگ پر نہیں ڈالی جاسکتی۔

ذرائع نے مزید بتایا کہ مریم نواز نے کہا کہ ہماری حکومت تو تب ہوگی جب صرف نواز شریف پاکستان میں ہوں گے، نواز شریف ہی پاکستان کو آگے لے کر جاسکتے ہیں۔