عدالت نے مصطفیٰ کمال کے کاغذاتِ نامزدگی کے خلاف درخواست ناقابل سماعت قرار دیتے ہوئے مسترد کردی۔

تفصیلات کے مطابق کراچی میں الیکشن ٹریبونل میں ایم کیوایم پاکستان کے رہنما مصطفیٰ کمال کے کاغذات نامزدگی منظوری کے خلاف درخواست کی سماعت ہوئی۔ عدالت نے مصطفیٰ کمال کے خلاف درخواست ناقابل سماعت قرار دیتے ہوئے مسترد کردی۔

الیکشن ٹریبونل کے سربراہ جسٹس آغا فیصل نے درخواست مسترد کی، مصطفیٰ کمال کے این اے 247 سے کاغذات نامزدگی کو چیلنج کیا گیا تھا۔

شہری پرویزاخترنے عبدالوہاب بلوچ ایڈووکیٹ کے توسط سے درخواست دائر کی تھی جس میں مؤقف اختیار کیا گیا کہ مصطفیٰ کمال دو پارٹیوں کے بیک وقت ممبر ہیں۔

عبدالوہاب بلوچ ایڈووکیٹ نے شہری کی درخواست میں مؤقف اپنایا کہ مصطفیٰ کمال پی ایس پی کے چیئرمین ہیں اور کاغذات نامزدگی ایم کیوایم کے پلیٹ فارم سے جمع کرائے۔ پولیٹیکل پارٹی ایکٹ کی سیکشن 202 اور 203 کے تحت مصطفیٰ کمال کے کاغذات نامزدگی مسترد کیے جائیں۔

واضح رہے کہ مصطفیٰ کمال نے این اے 247 سے ضمنی انتخابات میں امیدوار کی حیثیت سے کاغذات نامزدگی جمع کرائے تھے۔

الیکشن ٹربیونل نے این اے 244 میں ارشد ووہرا کے کاغذاتِ نامزدگی کی منظوری کیخلاف درخواست بھی مسترد کردی تھی۔ ارشد ووہرا کے کاغذات نامزدگی کو مخالف امیدوار رانا ذکی شمسی کی جانب سے چیلنج گئے تھے۔