کراچی پولیس آفس (کے پی او) پر دہشت گرد حملے کے پیش نظر پولیس کی جانب سے سول اسٹاف کو اسلحہ چلانے کی تربیت دینے کا فیصلہ کیا گیا ہے، جس کا نوٹیفکیشن بھی جاری کردیا گیا ہے۔

جاری کیے گئے نوٹیفکیشن کے مطابق پولیس کا اسپیشل سیکیورٹی یونٹ سول اسٹاف کو تربیت فراہم کرے گا اور سی پی او میں تعینات سول اسٹاف کے لئے ایک روزہ اسلحہ کاری فریشر کورس کرایا جائے گا۔

نوٹیفکیشن میں بتایا گیا ہے کہ کورس میں اسلحہ چلانے اور کیری کرنے کی ٹریننگ دی جائے گی تاہم سی پی او میں تعینات سول اسٹاف رضاکارانہ طور پر کورس میں حصہ لے سکتا ہے۔

یہ بھی پڑھیں:کراچی پولیس آفس حملہ؛ پولیس اور رینجرز اہلکار سمیت 4 شہید، تمام دہشت گرد جہنم واصل

نوٹیفکیشن کے مطابق کورس میں نامزدگی حاصل کرنے والے افراد اسلحہ لائسنس کے حامل ہوں یا جلد لائسنس حاصل کرنے کے خواہشمند ہوں۔

نوٹیفکیشن میں مزید کہا گیا کہ کورس کا مقصد کسی بھی دہشت گردی کے حملے میں اپنی حفاظت یقینی بنانا ہے۔

سندھ حکومت کا ایمبولینس سروس کے لئے ایس او پیز بنانے کا فیصلہ

اس سے قبل کراچی پولیس آفس (کے پی او) پر دہشت گرد حملے کے بعد حکومت سندھ کی جانب سے اہم فیصلہ کیا گیا ہے۔

سندھ حکومت نے کراچی میں ایمبولینس سروس کے لئے ایس او پیز بنانے کا فیصلہ کیا ہے۔

اس حوالے سے چیف سیکریٹری سندھ ڈاکٹر محمد سہیل راجپوت کی زیر صدارت اجلاس منعقد ہوا جس میں ایمبولینس سروس سے متعلق گفتگو کی گئی۔

چیف سیکریٹری سندھ نے اجلاس میں گفتگو کرتے ہوئے کہا کہ تمام ایمبولینس سروس منظور شدہ ایس او پی کے تحت آپریٹ کریں گی۔ قدرتی آفت، دہشت گردی کے واقعے کے دوران ایمبولینس سروس ایس او پیز کو یقینی بنانے کے پابند ہوں گے۔

یہ بھی پڑھیں: کراچی پولیس آفس حملے میں بھارتی خفیہ ایجنسی کے ملوث ہونے کے شواہد مل گئے

انہوں نے کہا کہ کراچی پولیس آفس واقعے کا پہلا زخمی ایک ایمبولینس سروس کا رضاکار تھا۔ اس واقعے میں سیکیورٹی فورسز کو ایمبولینس کے باعث ٹریفک جام کی وجہ سے دشواری ہوئی۔

سہیل راجپوت نے مزید کہا کہ معیاری آپریٹنگ طریقہ کار کا ڈرافٹ بنانے کے لئے سیکریٹری صحت کی سربراہی میں کمیٹی قائم کردی گئی ہے، جس میں ریسکیو 1122 اور نجی ایمبولینس سروس کے نمائندے شامل ہیں۔