آئی جی سندھ غلام نبی میمن نے کہا ہے کہ کراچی پولیس بہادری کی ایک تاریخ رکھتی ہے۔

تفصیلات کے مطابق آئی جی سندھ غلام نبی میمن نے اسپیشل سیکیورٹی یونٹ،آر آریف اور کراچی پولیس آفس کا تفصیلی دورہ کیا اور کراچی پولیس آفس پر دہشت گردانہ حملے کا مقابلہ کرنیوالے پولیس افسران اور جوانوں سے فرداً فرداً مصافحہ کیا اور انہیں شاباش دی جبکہ پولیس آفس کے شہداء کے لئے دعا اور فاتحہ خوانی بھی کی۔

آئی جی سندھ نے حملے میں شہید ہونیوالے پولیس اہلکاروں کی مزاحمت کو بھی داد شجاعت دیتے ہوئے کہا کہ ہم اپنے شہداء کی لازوال قربانیوں کو فراموش نہیں کرسکتے، شہداء کے ورثاء کی داد رسی اور انکا خیال رکھنا سندھ پولیس کی ذمہ داری ہے۔

آئی جی سندھ نے تشکیل کردہ ریوارڈ کمیٹی کو ہدایات دیں کہ دہشت گردوں کے خلاف جنگ میں حصہ لینے والے افسران اور جوانوں کی فہرست کو جلد حتمی شکل دی جائے تاکہ ایسے تمام ملازمان کو نقد انعامات اور تعریفی اسناد سے نوازا جاسکے۔

انہوں نے کہا کہ کراچی پولیس آفس پر دہشت گردانہ حملے میں آپ لوگوں کی دلیرانہ مزاحمت قابل ستائش ہے، آپ لوگوں کے منظم اور بروقت ایکشن کی بدولت دہشت گرد پسپا ہوئے۔

 ان کا کہنا تھا کہ آپ نے جس انداز میں دہشت گردوں کے عزائم کو خاک میں ملایا اسکی کوئی نظیر نہیں ملتی، آپکی جانب سے مستعد اور الرٹ اقدام نے دہشت گردوں کو منہ توڑ جواب دیا ہے۔

ان کا یہ بھی کہنا تھا کہ آر آرایف یونٹ میں مذید ایک یونٹ کراؤڈ مینجمنٹ یونٹ کا اضافہ کردیا گیا ہے جسکے تحت سی ایم یو کے 3 ہزار اہلکار بھی اب آر آر ایف کے ڈسپوزل پر آگئے ہیں۔

غلام نبی میمن نے کہا کہ دہشت گردوں کے داخلی مقام/عقبی ایریا میں سی سی ٹی وی کیمراز کی تنصیب اور دیگر تمام تنصیب شدہ کیمراز کی بھی جانچ کی جائے اور انہیں ورکنگ کنڈیشن میں رکھا جائے۔

انہوں نے کہا کہ کراچی پولیس بہادری کی ایک تاریخ رکھتی ہے، دہشت گرد جانتے نہیں تھے کہ انکا مقابلہ کس فورس سے ہے، کے پی او حملے میں جس طرح تمام فورسز نے دہشت گردوں کو نیست و نابود کیا وہ لائق ستائش و تحسین ہے۔

آئی جی سندھ غلام نبی میمن نے مزید کہا کہ پولیس افسران اور جوانوں نے جس طرح آگے بڑھ کر دہشت گردوں سے مقابلہ کیا اسکی کوئی نظیر نہیں ملتی، پولیس فورس ایک سیسہ پلائی ہوئی دیوار کی مانند عوام کی وہ ڈھال ہے جسے توڑنا یا گرانا دہشت گردوں کے بس کی بات نہیں ہے۔

اس موقع پر آئی جی سندھ کے ساتھ ایڈیشنل آئی جی کراچی جاوید اختر اوڈھو، ایڈیشنل آئی جی آپریشن کے علاوہ ڈی آئی جیز آر آر ایف، سی پیک فائنانس، سیکیورٹی، زونل ڈی آئی جیز، آپریشنز و لاجسٹکس سندھ کے اے آئی جیز اور دیگر سینئر افسران بھی تھے۔