امریکی محکمہ خارجہ کے ترجمان نیڈ پرائس پاک امریکہ مضبوط تجارتی و اقتصادی تعلقات وقت کی ضرورت ہیں۔

واشنگٹن میں میڈیا بریفنگ کے دوران امریکی محکمہ خارجہ کے ترجمان نیڈ پرائس نے کہا کہ پاک امریکہ تجارت و سرمایہ کاری  کے لیے وزارتی اجلاس جاری ہیں۔

نیڈ پرائس نے کہا کہ پاک امریکہ وزارتی اجلاس کی میزبانی امریکی تجارتی نمائندے نے کی، پاک امریکہ مضبوط تجارتی و اقتصادی تعلقات وقت کی ضرورت ہیں۔

یہ بھی پڑھیں: قرآن پاک کی بے حرمتی قابل مذمت، مکروہ اور نفرت انگیز ہے، نیڈ پرائس

انہوں نے کہا کہ  معاشی استحکام کی بدولت پاکستان حالیہ سیلاب  کی تباہی سےنبردآزما ہوسکتا ہے۔

ترجمان امریکی محکمہ خارجہ کا کہنا تھا کہ اجلاس میں امریکی کاروباری اداروں کو پاکستان میں تجارتی مواقع سےآگاہ کیا جارہا ہے۔ پاک امریکہ تجارتی تعلقات کو مزید فروغ دینے  کے لیے کوشاں ہیں۔

نیڈ پرائس نے کہا کہ گزشتہ 2 دہائیوں سے پاکستان میں سرمایہ کاری کرنے والوں میں امریکہ سرفہرست ہے۔ پاکستان میں 80 امریکی کمپنیوں میں ایک لاکھ 20 ہزار سے زائد ملازمتیں فراہم کی  گئی ہیں۔

یہ بھی پڑھیں: پاکستان کو 200 ملین ڈالرز کی امداد پر چیک اینڈ بیلنس رکھیں گے، نیڈ پرائس

ان کا مزید کہنا تھا کہ  دہشت گردی نے گزشتہ سالوں میں بے شمار پاکستانیوں  اور افغانیوں کی جان لی ہے۔

امریکی محکمہ خارجہ کے ترجمان نے کہا کہ افغان طالبان وعدوں کی پاسداری کریں اور اس بات کو  یقینی بنائیں کہ ٹی ٹی پی، القائدہ اور داعش خطے کے استحکام کو نقصان نہ پہنچائیں۔