چین میں کورونا وائرس سے مزید 71 افراد ہلاک ہوگئے جس کے بعد مرنے والوں کی تعداد 2 ہزار 663 ہو گئی ہے۔

عالمی ذرائع ابلاغ نے بتایا کہ چین کے قومی صحت کمیشن نے  کورونا وائرس کے 508 نئے مریضوں کی تصدیق کی ہے اور صوبہ ہوبئی میں لاکھوں افراد لاک ڈاؤن میں ہیں۔

عالمی ادارہ صحت نے خبردار کیا ہے کہ کورونا وائرس عالمی وباء بن سکتا ہے جس کے لیے دنیا کو تیار رہنا چاہیے۔ صرف چین میں اس مہلک وائرس سے ہونے والی ہلاکتوں کی تعداد 2 ہزار 663ہو گئی ہے۔

کورونا وائرس  اس وقت ایشیاء، یورپ  اور مشرق وسطیٰ  میں 50 کے قریب ممالک میں پھیل  چکا ہے۔

چین کے بعد سب سے زیادہ متاثر ہونے والے ملک جنوبی کوریا میں مزید 60 شہریوں میں وائرس کی تصدیق ہوئی ہے جس کے بعد وہاں متاثرین کی تعداد 893 ہو گئی ہے جبکہ 7 افراد ہلاک  بھی ہو چکے ہیں۔

ایران میں کورونا وائرس سے 50 ہلاکتیں، عراق میں بھی پہلے کیس کی تصدیق

جاپان میں اس مہلک وائرس سے ہلاک شدہ افراد کی تعداد 4 ہو گئی جبکہ اٹلی میں کورونا وائرس سے 7 افراد ہلاک ہوچکے ہیں۔

کویت، اومان، بحرین، عراق، افغانستان میں  بھی کورونا وائرس کے مریض سامنے آ گئے ہیں۔

ایرانی حکام کی جانب سے بتائی جانے والی 12 ہلاکتوں کے بعد ایران میں بھی خوف کے سائے برقرار ہیں۔

دوسری جانب ایران کے نیم سرکاری خبر رساں  ادارے  کے مطابق ایران میں اس مہلک وائرس سے 50 ہلاکتیں ہوچکی ہیں جبکہ سیکڑوں افراد  متاثر ہے۔

قم سے تعلق رکھنے والے ایرانی رکن پارلیمنٹ نے حکومت پر الزام لگایا کہ وہ ہلاکتوں کی اصل تعداد چھپارہی ہے اور قم میں بڑی تعداد میں لوگ اس وائرس سے ہلاک ہوگئے ہیں۔

خبر رساں ادارے نے قم کے ایک سرکاری اہلکار  کے حوالے سے بتایا ہے کہ  شہر میں 250 افراد کو قرنطینہ میں رکھا گیا ہے جبکہ ملک بھر میں دو روز سے اسکول بند ہیں۔