تاجر برادری اور ریسٹورنٹ مالکان  نے مارکیٹیں اور ریسٹورنٹ جلد بند کرنے کا حکومتی فیصلہ ماننے سے انکار کردیا۔

تفصیلات کے مطابق کراچی کی تاجر برادری نے حکومت کی جانب سے دکانیں رات ساڑھے 8 بجے بند کرنے کے فیصلے کو مسترد کردیا۔

یہ بھی پڑھیں: کراچی کے بازار، شادی ہال اور ریسٹورنٹ کے متعلق نیا حکم نامہ جاری

 چیئرمین آل سٹی تاجر اتحاد شرجیل گوپلانی کا کہنا ہے کہ   کراچی کی تاجر برادری اس فیصلے کو کسی صورت نہیں مانے گی۔ حکومت شعبان اور پھر رمضان میں یہ پابندی کیوں لگانا چاہتی ہے۔

انہوں نے کہا کہ  تاجر برادری پہلے ہی شدید مشکلات سے دوچار ہے ایسے میں کاروبار جلدی بند نہیں  کریں گے۔

آئرن اسٹیل مرچنٹ ایسوسی ایشن کے چوہدری ایوب نے کہا حکومت اپنے اخراجات کو کیوں کم نہیں کررہی  ہے۔  عوام اور تاجر بدترین مالی مشکلات سے دوچار ہیں ایسے میں کاروبار جلدی بند کرنے کا فیصلہ یکسر مسترد کرتے ہیں ۔

طاہر بنگش کا کہنا تھا کہ  توانائی کی بچت کے لیے موثر اقدامات کیے جائیں ۔

یہ بھی پڑھیں: تاجر برادری نے درآمدی پالیسی پر نظرثانی کا مطالبہ کردیا

دوسری جانب چیئرمین آل کراچی ریسٹورنٹس ایسوسی ایشن فیضان راوت کا کہنا ہے کہ حکومت کو چاہیئے کہ ریسٹورنٹس کو رات 12 بجے تک کام کرنے کی اجازت دی جائے۔

انہوں نے کہا کہ   رات 10 بجے ریسٹورنٹ بند کرنے کی صورت میں افراتفری ہوگی اور بے روزگاری بڑھے گی۔ہم 6 بجے اپنے ریسٹورنٹس میں کام کا آغاز کرتے ہیں لہذا حکومت رات 10 کے بجائے 12 بجے تک کام کرنے دے۔