فلسطینی مجاہدین کی جانب سے محصور ساحلی علاقے سے متعدد راکٹ داغے جانے کے بعد اسرائیل نے غزہ کی پٹی پربمباری کی ، جب کہ مقبوضہ مغربی کنارے کے شہر نابلس میں اسرائیلی فوج کے 20 سال کے سب سے مہلک حملے پرکشیدگی کے دوران کم از کم 11 فلسطینی ہلاک ہو گئے تھے۔

فلسطینی وزارت صحت نے کہا کہ 23 فروری کو اسرائیلی فوجیوں کے مغربی کنارے کے شہر نابلس پرحملے میں ایک 16 سالہ نوجوان سمیت 11 فلسطینی گولی لگنے سے ہلاک اور 80 سے زائد زخمی ہو گئے تھے، جس سے امن کے لیے بین الاقوامی اپیلیں کی گئیں۔

فلسطینی گروپ اسلامی جہاد نے نابلس میں ’’بڑے جرم‘‘ کا جواب دینے کے لیے ’’مزاحمتی فورسز‘‘ سے مطالبہ کرنے کے بعد راکٹ حملوں کی ذمہ داری قبول کرلی۔اسرائیلی فوج نے غزہ میں متعدد اہداف پر فضائی حملے کیے، جس سے آسمان پر سیاہ دھوئیں کے بادل چھا گئے۔اسرائیلی فوج نے ایک بیان میں کہا کہ میزائلوں نے حماس کے زیر اہتمام ’’اسلحے کی فیکٹری‘‘ اور’’فوجی کیمپ‘‘ کو نشانہ بنایا۔

اقوام متحدہ کے سربراہ انتونیوگوٹیرس نے کہا کہ’فوری ترجیح کشیدگی کو مزید بڑھنے سے روکنا ہے۔‘

انہوں نے تیزی سے بڑھتی ہوئی کشیدگی اور تعطل کے شکار امن کے عمل کی جانب اشارہ کرتے ہوئے کہا کہ ’’مقبوضہ فلسطینی سرزمین کی صورتحال حالیہ برسوں میں سب سے زیادہ اشتعال پذیر ہے۔‘‘ 2005ء میں دوسری فلسطینی بغاوت کے خاتمے کے بعد 23 فروری کوسب سے زیادہ ہلاکتیں ہوئی ہیں، جس نے مغربی کنارے کے ایک اورسورش کے شکار شہر جنین میں گزشتہ ماہ اسرائیلی حملے کو پیچھے چھوڑدیا۔

امریکی محکمہ خارجہ کے ترجمان نیڈ پرائس نے کہا کہ واشنگٹن ’’تشدد کی اس سطح پرانتہائی فکرمند ہے۔‘‘

ہمسایہ ملک اردن نے کہا کہ وہ امن کے حصول کے لیے تمام فریقوں کے ساتھ مل کر کام کرے گا۔

بشکریہ: الجزیرہ اور اے ایف پی