امریکی صدر ڈونلڈ ٹرمپ  نے ایک مرتبہ پھر پاکستان اور بھارت کے درمیان ثالثی کی پیش کش کردی۔

بھارتی دارالحکومت نئی دہلی میں پریس کانفرنس کرتے ہوئے امریکی صدر ڈونلڈ ٹرمپ نے کہا کہ  پاکستان اور بھارت کے ساتھ اچھے تعلقات ہیں۔

ڈونلڈ ٹرمپ  نے کہا کہ کشمیر بہت سے لوگوں کے لیے طویل عرصے سے بہت بڑا مسئلہ چلا آرہا ہے۔ میں پاکستان اوربھارت کے درمیان مسئلہ کشمیر پر مصالحت کرانے کے لیے تیار  ہوں۔

 انہوں نے کہا کہ پاکستان کے کچھ مسائل ہیں، جن کے حل کے لیے وہ اقدامات کررہا ہے۔ بھارت کی جانب سے  پاکستان کے اقدامات کا مثبت جواب ملنا چاہیے۔

امریکی صدر ڈونلڈ ٹرمپ کا تاج محل کا دورہ

یاد رہے کہ گذشتہ روز بھی امریکی صدر ڈونلڈ ٹرمپ نے بھارتی  سرزمین   پر پاکستان کے حق میں  بڑا بیان دیا تھا۔

 امریکی صدر نے  بھارتی عوام سے خطاب کرتے ہوئے  کہا  تھا کہ پاکستان کے ساتھ ہمارے اچھے تعلقات ہیں۔ ہماری انتظامیہ نے پاکستان سے دہشت گردی کے خاتمے کی بات کی  اور اس پر پاکستان کی جانب سے ہمیں مثبت رویہ ملا  ہے۔

ڈونلڈ ٹرمپ نے  مزید کہا  تھا کہ گذشتہ 10سالوں میں بھارت سے غربت کا خاتمہ ہوا  ہے۔بھارتی وزیر اعظم  نریندر مودی احمدآباد کے ایک اسٹال پر چائے والا ہوا کرتا تھا ۔

واضح رہے کہ امریکی صدر اپنی اہلیہ میلانیا ٹرمپ کے ساتھ دو روزہ دورے پر بھارت  میں موجود ہیں۔