27 فروری کا دن پاکستانی عوام  یقیناً سرپرائز ڈے کے نام سے یاد رکھتے ہیں کیونکہ اس دن مشہور آپریشن سوئفٹ ریٹارٹ انجام پایا تھا جسے آج 4 سال مکمل ہوگئے ہیں۔

آپریشن سوئفٹ ریٹارٹ کی چوتھی برسی پیر کو ملک کی مسلح افواج کو خراج تحسین پیش کرنے کے لیے منائی جا رہی ہے جس نے اسی دن 2019 میں بھارتی ناکام مہم جوئی کا منہ توڑ جواب دیا تھا اور ان کے دو لڑاکا طیاروں کو مار گرایا تھا جن کے نام MiG-21 اور Su- 30 تھے۔

آج کا دن بھارت کو صدیوں یاد رہے گا کیوں کہ 27 فروری وہ دن ہے جب پاکستان کی آزاد فضاؤں کے محافظ شاہینوں‌ نے دلیری اور شجاعت کی ایک نئی تاریخ‌ رقم کی اور بھارت کو دنیا بھر میں‌ ذلت آمیز شکست کا سامنا کرنا پڑا۔

پاک فضائیہ کے شاہینوں نے دشمن کو منہ توڑ جواب دے کر دنیا کو بتادیا کہ مملکت خداداد کے دفاع کے لیے ہم ہمہ وقت تیار ہیں۔

پاکستان نے بڑے پن کا مظاہرہ کرتے ہوئے جذبہ خیرسگالی کے تحت پائلٹ ابھی نندن کو بھارت کو واپس کردیا تھا۔

اس حوالے سے عسکری قیادت نے ایک بیان میں آپریشن سوئفٹ ریٹارٹ کے دوران قوم کی لچک اور مسلح افواج کے عزم کو خراج تحسین پیش کیا ہے۔

انہوں نے کہا کہ آج کا دن اس بات کی یاد دہانی کرے کہ ایک امن پسند قوم ہونے کے ناطے پاکستان کی مسلح افواج نہ صرف مادر وطن کے ایک ایک انچ کے دفاع کے لیے ہمہ وقت تیار رہتی ہیں بلکہ دشمن پر جارحیت مسلط کرنے کے لیے جنگ کو پسپا کر دیتی ہیں۔

ڈی جی آئی ایس پی آر نے کہا کہ کسی بھی فریب کے نتیجے میں کسی بھی مہم جوئی کا مقابلہ کیا جائے گا، پاکستان کی مسلح افواج کی بھرپور طاقت کے ساتھ مقابلہ کیا جائے گا، جسے ایک پرعزم قوم کی حمایت حاصل ہے۔