وزیر خارجہ شاہ محمود قریشی نے کہا ہے کہ مسئلہ کشمیر پر سیکرٹری جنرل اقوام متحدہ کی جانب سے مصالحت کی پیشکش خوش آئند ہے، سیکرٹری جنرل اقوام متحدہ انتونیو گوتریس کا دورہ پاکستان، اقوام عالم کا پاکستان پرتیزی سے بڑھتے ہوئے اعتماد کا مظہر ہے۔

تفصیلات کے مطابق وزیرخارجہ شاہ محمود قریشی سے اقوام متحدہ میں تعینات پاکستان کے مستقل مندوب منیر اکرم نے ملاقات کی جس میں خطے کے معاملات، کشمیر کی صوتحال اور افغان مفاہمتی عمل پر بات چیت کی گئی۔

وزارت خارجہ کی طرف سے جاری بیان کے مطابق منیر اکرم نے اقوام متحدہ کے سیکرٹری جنرل انتونیو گوتریس کے حالیہ دورہ پاکستان کی کامیابی پر وزیرخارجہ شاہ محموقریشی کو مبارکباد دی۔

 ملاقات میں وزیر خارجہ شاہ محمود قریشی نے کہا کہ 7 سال کے بعد سیکرٹری جنرل اقوام متحدہ کا دورہ پاکستان ، اقوام عالم کے پاکستان پرتیزی سے بڑھتے ہوئے اعتماد کا مظہر ہے۔

وزیر خارجہ شاہ محمود قریشی نے مزید  کہا کہ مسئلہ کشمیر پر سیکرٹری جنرل اقوام متحدہ کی جانب سے مصالحت کی پیشکش خوش آئند ہے۔

دوسری جانب وزیرخارجہ مخدوم شاہ محمود قریشی سے نیپال کے سیکریٹری خارجہ شنکرداس بیراگی کی  بھی ملاقات ہوئی۔

اقوام متحدہ کے سیکرٹری جنرل انتونیو گوتریس ایوان صدر پہنچ گئے

 شاہ محمود قریشی  نے  پاک نیپال سفارتی تعلقات کے ساٹھ سال پورے ہونے پر نیپالی سیکریٹری خارجہ کو مبارک پیش کی جبکہ دونوں طرف سے پاکستان نیپال دوطرفہ تعلقات کو مزید فروغ اور مضبوط بنانے کے عزم کا اعادہ بھی کیا۔

 اس موقع پر  وزیر خارجہ شاہ محمود قریشی نے نیپالی سیکرٹری خارجہ کو خطے کی صورتحال، خاص طور پر کشمیر کی صورتحال سے آگاہ کیا۔

شاہ محمود قریشی نے کہا کہ سارک کو دوبارہ فعال بنانے اور   اسکو علاقائی تعاون کے موثر فورم میں تبدیل کرنے کیلئے نیپال کی کوششوں کو سراہتے ہیں۔

یاد رہے کہ شنکرداس کی قیادت میں نیپالی وفد پاکستان کے دورے پر ہے، نیپالی وفد پاکستان نیپال دوطرفہ سیاسی مشاورت کے چوتھے دور کے لئے پاکستان آیا ہے۔