عدالت نے پی ٹی آئی رہنماؤں شبلی فراز، مراد سعید، شہزاد وسیم، راجہ خرم نواز اور دیگر کی عببوری ضمانتیں منظور کر لیں۔ 

تفصیلات کے مطابق پی ٹی آئی رہنما شہزاد وسیم اور راجہ خرم نواز کے خلاف انسدادِ دہشت گردی ایکٹ کے تحت درج مقدمے اور عمران خان کی پیشی کے موقع پر ہنگامہ آرائی اور کارسرکار میں مداخلت کے معاملے میں انسداد دہشت گردی عدالت اسلام آباد میں سماعت ہوئی۔

عدالت نے پی ٹی آئی رہنما شبلی فراز، مراد سعید، عامر کیانی، حسان نیازی محمد عاصم کی کی عبوری ضمانت منظور کی، عدالت نے ملزمان کی 20،20ہزار کے ضمانتی مچلکوں کے عوض ضمانت منظور کی جبکہ ملزمان کے وکلا کی استدعا پر ضمانتی مچلکوں کو 1 لاکھ سے کم کر کے 20 ہزارکیا گیا۔

انسداد دہشتگری عدالت کے جج راجہ جواد عباس حسن نے ضمانت منظور کی، جوڈیشل کمپلیکس اور اسلام آباد ہائی کورٹ میں ہنگامہ آرائی سے متعلق تھانہ رمنا میں مقدمہ درج ہے۔

دوسری جانب دیگرپی ٹی آئی رہنما شہزاد وسیم اور راجہ خرم نواز کے خلاف انسدادِ دہشت گردی ایکٹ کے تحت درج مقدمے کے معاملے میں عدالت نے شہزاد وسیم اور راجہ خرم نواز کی عبوری ضمانت 13 مارچ تک منظور کرلی۔

انسدادِ دہشت گردی عدالت کے جج راجہ جواد عباس نے دونوں پی ٹی آئی رہنماؤں کی عبوری ضمانت منظور کی، شہزاد وسیم اور راجہ خرم نواز نے آج عبوری ضمانت کی درخواست دائر کی تھی۔

واضح رہے کہ عمران خان کی جوڈیشل کمیشن پیشی کے دوران توڑپھوڑ پر پی ٹی آئی رہنماؤں کے خلاف تھانہ رمنا میں مقدمہ درج کیاگیاتھا۔