رہنما مسلم لیگ (ق) چودھری شجاعت حسین نے کہا ہے کہ صدر ٹرمپ مسئلہ کشمیر حل کروائیں اور کشمیریوں پر مظالم بند کروائیں۔

تفصیلات کے مطابق چودھری شجاعت حسین سے سابق وزیراعظم آزاد کشمیر سردار عتیق کی ملاقات ہوئی جبکہ ملاقات کے دوران چودھری پرویزالٰہی، سالک حسین، سینیٹر کامل علی آغا بھی موجود تھے۔

چوہدری شجاعت حسین نے کہا کہ اقوام متحدہ کی قراردادیں ردی کا ٹکڑا بن چکیں ہیں اور اگر 1971ء میں بنگلہ دیش قائم کیا جا سکتا ہے تو مقبوضہ کشمیر کو آزاد اور خودمختار کیوں نہیں بنایا جا سکتا ہے۔

ان کا کہنا تھا کہ مقبوضہ کشمیر میں انسانی حقوق کو پامال کیا جا رہا ہے لیکن اب کشمیر میں جو نئے آپشن پر عملدرآمد کروائے گا تاریخ میں ہمیشہ کیلئے زندہ رہے گا اور امریکی صدر ٹرمپ اقوام متحدہ کو کشمیر پر ماضی کی قرارداد چھوڑ کر دوسرے آپشن پر آمادہ کر سکتے ہیں۔

انہوں نے مزید کہا کہ موجودہ حالات کے تناظر میں کشمیر کی خودمختاری ایک دلیرانہ اور مقبول فیصلہ ہو گا اور ڈونلڈ ٹرمپ کشمیر کے مسئلہ کے حل کیلئے کامیاب کردار ادا کرنے کی صورت میں اگلا صدارتی الیکشن باآسانی جیت سکتے ہیں۔

چوہدری شجاعت کا کہنا تھا کہ امریکی صدر ڈونلڈ ٹرمپ اقوام متحدہ کو 72 سالہ پرانی قرارداد چھوڑ کر خودمختار کشمیر کا کہیں اور صدر ٹرمپ پاکستان اور بھارت کے درمیان ثالثی کے بجائے مصالحتی کا کردار ادا کریں۔

انہوں نے کہا کہ صدر ٹرمپ مسئلہ کشمیر حل کروائیں اور کشمیریوں پر مظالم بند کروائیں جہاں نصف شپ معصوم اور نابالغ لڑکیوں کو جبراً اٹھا کر فوجی بیرکوں میں لے جایا جاتا ہے۔