لاہور میں آج یوم پاکستان کی مناسبت سے مصورِ پاکستان اور شاعرِ مشرق ڈاکٹر علامہ اقبال کے مزار پر گارڈز کی تبدیلی کی پروقار تقریب منعقد ہوئی۔

تفصیلات کے مطابق لاہور میں صبح سویرے مصورِ پاکستان، شاعرِ مشرق ڈاکٹر علامہ اقبال کے مزار پر گارڈز کی تبدیلی کی پروقار تقریب کا انعقاد ہوا۔

تقریب میں پاک فضائیہ کے چاک و چوبند دستے نے اعزازی گارڈ کے فرائض سنبھال لئے اور مزار اقبال پر سلامی بھی پیش کی۔

تقریب کے مہمانِ خصوصی ایئروائس مارشل سید عمران ماجد علی، ایئر آفیسر کمانڈنگ پی اے ایف ایئر مین اکیڈمی کورنگی کریک تھے۔

اس کے علاوہ پاک فضائیہ نے رینجرز کے جوانوں کی جگہ سیکیورٹی کے فرائض سنبھال لئے۔

مہمانِ خصوصی نے مزار اقبال پر پھول کی چادر چڑھائی اور مہمانوں کی کتاب میں تاثرات درج کروائے۔

اس موقع پر ملک و قوم کی سلامتی کے لئے خصوصی دعا بھی کی گئی۔

اس حوالے سے ترجمان پاک فضائیہ نے بتایا کہ پاک فضائیہ کے دستے نے مزار اقبال پر گارڈ ڈیوٹیز سنبھال لیں، پاک فضائیہ کے تمام بیسز اور تنصیبات پر یوم پاکستان روایتی جوش و جذبے کے ساتھ منایا گیا۔

ترجمان کے مطابق دن بھر جاری رہنے والی تقریبات کا آغاز  نمازِ فجر کے بعد پاکستان اور عالم اسلام کی یکجہتی، ترقی اور خوشحالی کے لیے خصوصی دعاؤں سے کیا گیا۔

پاک فضائیہ کے ترجمان کا کہنا تھا کہ یوم پاکستان کے موقع پر عظیم شاعر اور فلسفی علامہ محمد اقبال کے مزار پر گارڈز کی تعیناتی اور پھولوں کی چادر چڑھانے کی تقریب منعقد ہوئی۔

ترجمان نے بتایا کہ پاک فضائیہ کے ایک چاق و چوبند دستے نے مزار اقبال پر ستلج رینجرز کی جگہ گارڈ ڈیوٹیز سنبھال لیں۔ ایئر وائس مارشل سید عمران ماجد علی، ایئر آفیسر کمانڈنگ، پی اے ایف ایئر مین اکیڈمی، کورنگی کریک نے مزار اقبال پر حاضری دی۔

ترجمان پاک فضائیہ نے کہا کہ ایئر وائس مارشل سید عمران ماجد علی نے سربراہ پاک فضائیہ، ایئر مین اور سویلینز کی جانب سے مزار اقبال پر پھولوں کی چادر چڑھائی اور فاتحہ خوانی کی۔

ترجمان نے مزید کہا کہ بیس کمانڈر پی اے ایف بیس لاہور ایئر کموڈور تنویر احمد بھی گارڈز کی تعیناتی کے موقع پر موجود تھے تاہم تقریب میں مختلف شعبہ ہائے زندگی سے تعلق رکھنے والے افراد کی بڑی تعداد نے شرکت کی۔