لاہورکی احتساب عدالت نے خواجہ برادران کے خلاف پیراگون ریفرنس نیب ترامیم کے تحت چیئرمین نیب کو واپس بھجوا دیا۔
تفصیلت کے مطابق خواجہ برادران سعد رفیق اور سلمان رفیق کے خلاف پیراگون ریفرنس کی احتساب عدالت لاہور میں میں سماعت ہوئی۔
احتساب عدالت کے جج قمرالزمان نے خواجہ برادران کی بریت کی درخواستوں پر محفوظ کیا گیا فیصلہ سنایا۔
جج نے ریمارکس دیے کہ سعد رفیق اور سلمان رفیق کی بریت کی درخواستوں پر بھی کوئی فائنڈنگ نہیں دی، عدالت کو نئی ترامیم کے تحت اس کیس پر سماعت کا اختیار نہیں ہے۔
احتساب عدالت نے پیراگون ہاؤسنگ ریفرنس نیب کو واپس بھیج دیا۔
نیب کی نئی ترمیم کے تحت عدالت کو سماعت کا اختیار نہیں#BOLNews #NAB pic.twitter.com/CVdzo9aJr4— BOL Network (@BOLNETWORK) March 29, 2023
خواجہ برادران کے وکیل امجد پرویز نے بریت کی درخواستوں پر دلائل دیتے ہوئے کہا کہ سعد رفیق اور سلمان رفیق نہ پیراگون کے شیئر ہولڈر ہیں، نہ اسپانسر، نہ ڈائریکٹر ہیں، اس کیس میں جرم ثابت ہونے کا امکان نہیں ہے۔
وکیل امجد پرویز نے کہا کہ ابھی تک نیب کے جتنے بھی گواہ ریکارڈ ہوئے وہ کچھ بھی ریکارڈ پر نہیں لاسکے، عدالت دونوں کی بریت کی درخواستوں کو منظور کرے۔
واضح رہے کہ خواجہ برادران کو لاہور ہائی کورٹ سے ضمانت خارج ہونے پر 11 دسمبر 2018ء کو گرفتار کیا گیا تھا، ان پر 4 ستمبر 2019ء کو فرد جرم عائد کی گئی اور سپریم کورٹ سے 17 مارچ 2020ء کو ضمانت منظور ہوئی۔
