بشریٰ انصاری ایک شاندار پاکستانی ٹیلی ویژن اداکارہ، میزبان اور مصنفہ ہیں جو اپنی اداکاری اور میزبانی کی وجہ سے پسند کی جاتی ہیں۔ شائقین ان کی مزاحیہ صلاحیتوں کو بھی پسند کرتے ہیں۔

پاکستان شوبز انڈسٹری کی تجربہ کار اداکارہ بشریٰ انصاری نے اعتراف کیا کہ انہیں عمر کے ساتھ ساتھ کچھ بیوٹی ٹریٹمنٹ کروانے میں کوئی اعتراض نہیں ہے، تاہم وہ سرجری کے ذریعے کوئی سخت تبدیلیاں نہیں لانا چاہیں گی۔

ان کا مزید کہنا تھا کہ ’لوگ کہتے ہیں کہ میں نے ہونٹ پر فلرز کیے ہیں لیکن میں اپنی لپ اسٹک بہت چالاکی سے لگاتی ہوں، میں ایک آؤٹ لائن بناتی ہوں اور اسے ہلکے شیڈ سے بھرتی ہوں کیونکہمیرے ہونٹ واقعی پتلے ہیں‘۔

انہوں نے عمر کے حوالے سے تبصروں پر بات کرتے ہوئے کہا کہ مجھے لگتا ہے کہ لوگ آپ کی عمر کو اس وقت نشانہ بناتے ہیں جب انہیں آپ کے بارے میں بات کرنے کے لیے کچھ نہیں ملتا، مجھے عمر کے بارے میں سن کر کوئی اعتراض نہیں ہوتا۔

ان کا کہنا تھا کہ یہ میرے لیے طعنہ نہیں ہے۔ میں 67 سال کی ہوں اور میں اس کے ساتھ ٹھیک ہوں، جب میں 27 سال کی تھی تو میں نے آنگن تیڑھا میں 60 سال کی بوڑھی خاتون کا کردار ادا کیا۔

انہوں نے مزید کہا کہ مجھے اپنی عمر پر فخر ہے، اگر میں 67 سال کی ہوں اور میں 57 سال کی نظر آتا ہوں تو میں اس پر خوشی محسوس کرتی ہوں۔