پاکستان کے سابق فاسٹ بولر محمد عامر نے حارث رؤف کی جانب سے وہاب ریاض کو پسندیدہ بولر قرار دینے کے بعد اپنے خیالات کا اظہار کیا ہے۔

میڈیا سے گفتگو کے دوران محمد عامر نے حارث رؤف کی رائے کا احترام کرتے ہوئے اس بات پر زور دیا ہے کہ ہر ایک کی ذاتی ذاتی پسند ہوتی ہے۔

لیجنڈری لیفٹ آرم فاسٹ بولر وسیم اکرم کی تعریف کرتے ہوئے 31 سالہ کھلاڑی نے اس بات پر روشنی ڈالی کہ ذاتی ترجیحات افراد کی رائے کو تشکیل دینے میں اہم کردار ادا کرتی ہیں۔

انہوں نے کہا کہ ’’میں اس چیز کو مثبت طور پر لیتا ہوں کیونکہ ہر کسی کا اپنا ذاتی پسندیدہ کھلاڑی ہوتا ہے، بالکل اسی طرح جیسے میرے پسندیدہ بولر وسیم اکرم ہیں۔

ان کا کہنا تھا کہ بائیں ہاتھ کے کتنے ہی بڑے بولر آئے لیکن وسیم اکرم ہمیشہ میرے پسندیدہ رہیں گے۔ اس کا مطلب یہ نہیں کہ میں کسی دوسرے کو ناپسند کرتا ہوں۔

محمد عامر کہتے ہیں کہ بولرز میں حارث رؤف کی وہاب ریاض ذاتی پسند ہوسکتے ہیں اور میرے خیال میں یہ ان کی رائے ہے تو اس میں کوئی حرج نہیں ہے۔

واضح رہے کہ اس سے قبل ایک مقامی ٹی وی ٹاک شو کے دوران حارث رؤف سے پوچھا گیا تھا کہ وہاب ریاض یا محمد عامر میں سے کون سا پاکستانی فاسٹ بولر بہتر ہے۔

سوال کے جواب میں حارث رؤف نے کہا تھا کہ وہاب ریاض محمد عامر سے بہتر بولر ہیں۔