اسلام آباد کی مقامی عدالت نے توشہ خانہ کیس میں چیئرمین پی ٹی آئی کو آئندہ سماعت پر حاضری یقینی بنانے کی ہدایت کردی۔

تفصیلات کے مطابق ڈسٹرکٹ اینڈ سیشن کورٹس اسلام آباد میں توشہ خانہ کیس کی سماعت ایڈیشنل سیشن جج ہمایوں دلاور کی عدالت میں ہوئی۔

چیئرمین پی ٹی آئی کے وکیل گوہرعلی خان اور الیکشن کمیشن کے وکیل امجد پرویزعدالت میں پیش ہوئے۔

وکیل گوہرعلی خان نے مؤقف اپنایا کہ سیشن عدالت میں کیس 8 جولائی کے لیے مقررتھا، چیئرمین پی ٹی آئی نے آج لاہور ہائی کورٹ میں پیش ہونا ہے۔

سیشن جج نے ریمارکس دیے کہ اسلام آباد ہائی کورٹ نے 7 دنوں میں کیس کا فیصلہ کرنے کی ہدایت کی ہے، جس پر وکیل گوہرعلی خان نے کہا کہ 10 کے بعد کوئی بھی اگلی سماعت کی تاریخ دےدیں۔

چیئرمین پی ٹی آئی کی جانب سے آج حاضری سے استثنا کی درخواست دائر کی گئی۔

وکیل گوہرعلی خان نے کہا کہ ہمیں معلوم نہیں تھاکہ کیس آج فکس ہے، رات کو واٹس ایپ پر معلوم ہوا جس پر سیشن جج نے ریمارکس دیے کہ وکیل شیرافضل نے کہا12 بجے تک سماعت کو روک لیں۔ وکیل شیرافضل نے کہا خواجہ حارث نے پیش ہونا ہے۔

وکیل گوہرعلی خان نے جواب دیا کہ شیرافضل تو نہیں میں خواجہ حارث کی جگہ پیش ہوا ہوں جس پر جج ہمایوں دلاور نے کہا کہ عدالت آپ کیساتھ بہت رعایت سے چل رہی ہے۔

بیرسٹر گوہرنے دلائل دیے کہ چیئرمین پی ٹی آئی کیخلاف 170 مقدمات درج ہیں، دس جولائی تک چیئرمین پی ٹی آئی عدالت کو استثنی دے۔

وکیل الیکشن کمیشن امجد پرویز ایڈووکیٹ نے کہا کہ شفاف ٹرائل کا حق تمام فریقین کا ہے، سات ماہ میں ایک مرتبہ بھی عمران خان پیش نہیں ہوئے۔ گرفتاری کی وجہ سے صرف ایک مرتبہ چیئرمین پی ٹی آئی پیش ہوئے تھے۔

سماعت کے دوران الیکشن کمیشن کی جانب سے حاضری سے استثنی کی درخواست کی مخالفت کی گئی جبکہ چیئرمین پی ٹی آئی کے وکیل بیرسٹر گوہر نے سماعت 10 جولائی تک ملتوی کرنے کی استدعا کی۔

خواجہ حارث کی جانب سے سماعت ملتوی کرنے کی درخواست بھی جمع کرا دی گئی۔ بیرسٹرگوہرنے کہا کہ خواجہ حارث 10 جولائی سے پہلے دستیاب نہیں ہوں گے۔

وکیل الیکشن کمیشن نے کہا کہ اسلام آباد ہائی کورٹ نے 7 دن میں فیصلے کی ہدایت کی ہے۔

عدالت نے چیئرمین پی ٹی آئی کی حاضری سے استثنی کی درخواست منظورکرتے ہوئے چیئرمین تحریک انصاف کو آئندہ سماعت پر حاضری یقینی بنانے کی ہدایت کردی اورمقدمہ کی سماعت 7 جولائی تک ملتوی کر دی گئی۔

بیرسٹرگوہرنے عدالت سے تاریخ تبدیل کرنے کی دوبارہ استدعا کی جب کہ وکیل الیکشن کمیشن نے کہا کہ اسلام آباد ہائی کورٹ نے 7 دن میں فیصلے کی ہدایت کی ہے۔