وائس چیئرمین تحریک انصاف شاہ محمود قریشی کے قریبی ساتھی شیخ مظہر عباس نے بھی پارٹی چھوڑنے کا اعلان کر دیا۔

تفصیلات کے مطابق شیخ مظہر عباس نے اپنے 30 سے زائد ساتھیوں کے ہمراہ پریس کلب میں نیوز کانفرنس کرتے ہوئے کہا کہ میں اور میرے قریبی تمام دوست احباب آج تحرک انصاف چھوڑنے کا اعلان کر رہے ہیں، ہم نو مئی کے واقعات کی مذمت کرتے ہیں، ہم تمام نوجوان پاک فوج کیساتھ کھڑے ہیں۔

شیخ مظہر نے کہا کہ آج ہم اگر امن و سکون کیساتھ ہیں تو پاک فوج کا اس میں اہم کردار ہے، ہمارے فوجی ہماری حفاظت کے لیے بارڈر پر موجود ہیں، نوجوان طبقہ پاک فوج کیساتھ ہے اور رہے گا، ان ہی نوجوانوں نے تحریک انصاف کو مظبوط کیا جلسے جلوسوں میں شرکت کی۔

ان کا کہنا تھا کہ عمران خان سے سوال کرتا ہوں کہ کیا یہ وہ پاکستان ہے جس کا آپ نے ہمیں خواب دیکھایا تھا؟ اس قوم نے اپنی فوج کا بازو بننا تھا لیکن آج اسی فوج کا مجرم بن گئے، کیا باپ نے اپنے لخت جگر کو آپ کیساتھ اس لیے لگایا کہ وہ مجرم بن سکے، جن فوجی جوانوں نے ملک کی خاطر اپنی جان کے نذرانے پیش کیے ان کے مجسمے شہید کیے گئے، آج جب ملک کا مستقبل جیل میں ہے تو آپ اس نوجوان کے لیے منہ سے ایک لفظ نہیں نکال پا رہے۔

انہوں نے یہ بھی کہا کہ خان صاحب اگر آپ کو بشریٰ بی بی سے فرصت مل جائے تو غریب کارکن کے بارے میں بھی سوچیں، ہم آج اپنے آپ کو تحریک انصاف سے علیحدہ کرتے ہیں۔