پرویز اشرف نے کہا ہے کہ سویڈن میں قرآن پاک کی بے حرمتی کے واقعہ نے مسلمانوں کے جذبات کو بری طرح مجروح کیا ہے۔

تفصیلات کے مطابق اسپیکر قومی اسمبلی راجہ پرویز اشرف نے سویڈن میں قرآن پاک کی بے حرمتی کے دلخراش واقعہ کی پر زور مذمت کرتے ہوئے کہا کہ سویڈن میں قرآن پاک کی بے حرمتی کے واقعہ نے دنیا بھر میں بسنے والے دو ارب سے زائد مسلمانوں کے احساسات اور جذبات کو بری طرح مجروح کیا ہے۔

انہوں نے کہا کہ دنیا کا کوئی مذہب بھی اس طرح کے گھناؤنے فعل کی اجازت نہیں دیتا، یوم تقدس قرآن کی بے حرمتی کے خلاف ملک بھر میں احتجاجی ریلیوں اور جلوسوں میں عوام کی بھر پور شرکت اس واقعہ پر پاکستانی عوام میں پائے جانے والے غم و غصہ قرآن کریم اور دین اسلام سے لازوال محبت کا منہ بولتا ثبوت ہے۔

راجہ پرویز اشرف نے یہ بھی کہا کہ قرآن پاک ایک آفاقی کتاب ہے جو اللہ تعالیٰ کی جانب سے خاتم النبین حضرت محمد ؐ پر نازل ہوئی انسانیت سے محبت ، ایثار ، قربانی اور امن وآشتی کا درس دیتی ہے۔

ان کا کہنا تھا کہ اسلام امن و سلامتی کا مذہب ہے اور تمام مذاہب کے ماننے والوں کے ساتھ امن و رواداری کا سلوک روا رکھنے کی تعلیمات دیتا ہے۔

انہوں نے کہا کہ سویڈن میں قرآن پا ک کی بے حرمتی کا پیش آنے والا واقعہ مختلف مذہب کے ماننے والوں کو ایک دوسرے سے دور کرنے اور ان کے دلوں میں ایک دوسرے کیلئے نفرتیں اور کدورتیں پیدا کرنے کی گھنائونی سازش ہے۔

اسپیکر قومی اسمبلی راجہ پرویز اشرف کا مزید کہنا تھا کہ گزشتہ روز پارلیمنٹ کے مشترکہ اجلاس میں اراکین پارلیمنٹ نے اس واقعہ کی بھر پور مذمت کی اور مذمتی قرار داد بھی منظور کی گئی ہے۔