یونان کشتی حادثے میں ملوث اہم سرغنہ کو گجرات سے گرفتار کرلیا گیا ہے۔

تفصیلات کے مطابق ایف آئی اے اینٹی ہیومن ٹریفیکنگ سرکل گجرات نے یونان کشتی حادثے کے کیس سے متعلق بڑی کارروائی کی جس کے نتیجے میں ایک اہم سرغنہ کو گرفتار کرلیا گیا۔

ایف آئی اے کے ترجمان کا کہنا ہے کہ ملزم محمد سلیم سنیارے کو گجرات سے گرفتار کیا گیا، ملزم یونان کشتی حادثے کے مرکزی ملزم آصف سنیارے کا بھائی ہے۔

ترجمان کے مطابق ملزم نے متعدد پاکستانیوں کو غیر قانونی راستے سے یورپ بھجوانے کے لئے کروڑوں روپے بٹورے۔

ترجمان ایف آئی اے نے بتایا کہ ملزم کے خلاف 9 مقدمات ایف آئی اے گجرات سرکل میں درج تھے تاہم گرفتار ملزم محمد سلیم سنیارا ہنڈی حوالے کے ذریعے اپنے بھائی آصف سنیارے کو پیسے بھجواتا تھا۔

ملزم یونان کشتی حادثے کے بعد روپوش ہو گیا تھا، اس کو جدید ٹیکنالوجی کا استعمال کرتے ہوئے گرفتار کیا گیا۔

ترجمان نے مزید کہا کہ ملزم کا بھائی آصف سنیارا اس وقت لیبیا میں موجود ہے، اس نے لیبیا میں متعدد سیف ہاؤسسز بنائے ہوئے ہیں تاہم، ملزم سے مزید تفتیش جاری ہے۔

واضح رہے کہ گزشتہ ماہ 14 جون کو لیبیا سے اٹلی جانے والی کشتی بین الاقوامی پانیوں میں یونان کے ساحل کے قریب حادثے کا شکار ہو کر ڈوب گئی تھی، جس میں سینکڑوں پاکستانی بھی سوار تھے۔

سمندر میں ڈوبنے والوں میں سے اب تک مجموعی طور پر 104 افراد کو بچایا گیا اور 82 لاشیں ملی ہیں، لیکن زندہ بچ جانے والے افراد کے اعداد و شمار کے مطابق جہاز میں 750 افراد سوار تھے۔

پاکستان کی وفاقی تحقیقاتی ایجنسی (ایف آئی اے) اس معاملے کی تحقیقات میں مصروف ہے اور انسانی اسمگلنگ میں ملوث افراد کی گرفتاری کے ساتھ ساتھ حادثے کا شکار ہونے والوں کی شناخت کے لئے ڈی این اے نمونے اور فنگر پرنٹس بھیجے جانے کا سلسلہ بھی جاری ہے۔