پاکستانی فلم ساز ابو علیحہ نے سندھی زبان میں فلم بنانے کا اعلان کر دیا ہے، اس سے قبل آخری بار 1997 میں سندھی زبان میں فلم ریلیز کی گئی تھی۔

نجی میڈیا ادارے کو انٹرویو دیتے ہوئے ’دادل‘ اور ’جاوید اقبال – ان کہی کہانی‘ جیسے منفرد موضوعات پر فلم تخلیق کرنے والے مایاناز فلم ساز ابو علیحہ نے سندھی زبان میں فلم بنانے کا اعلان کیا۔

انہوں نے اس حوالے سے ایک سوشل میڈیا پلیٹ فارم ٹوئٹر پر ٹوئٹ کرتے ہوئے بتایا کہ عمرکوٹ ، تھرپارکر سے تعلق رکھنے والی گلوکارہ نرملا نے تھرپارکر سے کراچی آکر ان کی فلم کے لئے 2 گانے ریکارڈ کروا دیئے ہیں۔

نجی میڈیا کو انٹرویو دیتے ہوئے انہوں نے بتایا کہ وہ ان دنوں اپنی سندھی فیچر فلم ‘بھوپو’ کی ہدایت کاری میں مصروف ہیں جس کی کہانی انہوں نے خود لکھی ہے۔

Advertisement

نرملا کا تعلق عمر کوٹ، تھر پارکر سے ہے۔ کمال کی سنگر ہیں۔ میری نئی فلم کے لئے تھر پارکر سے کراچی آکر انہوں نے دو گانے ریکارڈ کروائے۔ اس موقع پر میوزک پروڈیوسر علی اللہ دتہ کے ساتھ۔ pic.twitter.com/VzguoQt27E

— Abu Aleeha (@abualeeha) July 10, 2023

اس حوالے سے گفتگو کرتے ہوئے انہوں نے بتایا کہ آخری سندھی فیچر فلم 1997 میں ریلیز ہوئی تھی، 26 سال بعد اس زبان میں فلم تحریر کی ہے۔

انہوں نے فلم کی کہانی بتاتے ہوئے بتایا کہ فلم تھرپارکر اور راجستھان کے قدیم بھوپا قبائل پر مبنی ہے جس کی سیکڑوں سال پرانی وراثت ہے۔ وہ اکثر کالے جادو کے حوالے سے جانے جاتے ہیں۔ یہ فلم ایک کلاسٹروفوبک تھرلر ہے جس کی کہانی محبت اور بقا کے گرد گھومتی ہے۔

انہوں نے بتایا کہ فلم میں حقیقت سے قریب تر رنگ بھرنے کے لئے انہوں نے سندھی اداکاروں کو مرکزی کرداروں کے لئے منتخب کیا ہے جو زبان سے اچھی طرح واقف رکھتے ہیں، حتیٰ کہ معاون اداکار بھی تھرپارکر سے چنے گئے ہیں۔

تھرپارکر کی ریکی کے دوران احساس ہوا کہ اردو یا کسی اور زبان میں یہاں کی کہانی نہیں بتائی جاسکتی۔ اسے مقامی سندھی اور تھری زبان میں ہی بتانا ہوگا۔سکرپٹ کا سندھی میں ترجمہ کروایا۔ اب "بھوپو" کو سندھی میں بنارہے ہیں۔ 26 برس بعد سندھی فلم بننے جارہی ہے۔بعد میں اردو میں ضرور ڈب کرینگے pic.twitter.com/Gdkr7veaN6

— Abu Aleeha (@abualeeha) July 11, 2023

انہوں نے بتایا کہ اس کے لئے انہوں نےایک ایکٹنگ کوچ بھرتی کیا ہے جو ان کی اداکاری کی صلاحیتوں کو بڑھانے کے لیے ورکشاپس کا انعقاد کرے گا۔

انہوں نے بتایا ہے کہ فلم کی شوٹنگ سندھی زبان ہوگی جبکہ اردو زبان میں ڈب کی جائے گی اور اسے بین الاقوامی سطح پر ریلیز کیا جائے گا۔