فیاض الحسن چوہان نے کہا ہے کہ جیل جاکر چئیر مین تحریک انصاف کو فیاض الحسن چوہان کی سوا سالہ پرفارمنس دیکھنے اور سُننے کو ملے گی۔

تفصیلات کے مطابق استحکامِ پاکستان پارٹی کے ترجمان اور سابق صوبائی وزیر فیاض الحسن چوہان نے چیئرمین تحریک انصاف کے اڈیالہ جیل میں پابندِ سلاسل ہونے پر دلچسپ ویڈیو بیان جاری کیا جس میں ان کا کہنا ہے کہ چئیرمین تحریک انصاف کو اڈیالہ جیل میں میری وزارتِ جیل خانہ جات کی پرفارمنس سے آگاہی حاصل ہوگی۔

استحکامِ پاکستان پارٹی کے ترجمان نے کہا کہ چئیرمین تحریک انصاف ہر وقت مراد سعید کی پرفارمنس کا ڈھنڈوڑا بجایا کرتے تھے، سرکاری طور پر مراد سعید اور اُس کی منسٹری کی پرفارمنس کو نمبر ون قرار دیا جاتا تھا۔

فیاض الحسن چوہان نے یہ بھی کہا کہ مجھے نہیں علم کہ مراد سعید نے چئیرمین تحریک انصاف کوکونسی گیدڑ سنگھی سُنگھائی ہوئی تھی، جیل کے افسران اور ملازمین چئیرمین تحریکِ انصاف کو میری سوا سال کی پرفارمنس سے ضرور آگاہ کریں گے۔

استحکامِ پاکستان پارٹی کے ترجمان اور سابق صوبائی وزیر فیاض الحسن چوہان نے مزید کہا کہ جیل ملازمین اور قیدیوں کے لیے میرے انقلابی اقدامات سے اُنہیں بخوبی آگاہی حاصل ہوگی جبکہ جیل ملازمین اور قیدیوں کے لیے کیے گئے لازوال فلاح بہبود کے اقدامات کا علم ہوگا، جیل جاکر چئیر مین تحریک انصاف کو فیاض الحسن چوہان کی سوا سالہ پرفارمنس دیکھنے اور سُننے کو ملے گی۔