رانی پور میں 10 سالہ کمسن گھریلو ملازمہ مبینہ تشدد سے جاں بحق ہوگئی ہے۔

تفصیلات کے مطابق کمسن گھریلو ملازمہ پر تشدد کے نتیجے میں ہلاکت کا ایک اور انسانیت سوز واقعہ سامنے آگیا ہے جہاں خیرپور کرانی پورمیں 10 سال کی ملازمہ مبینہ تشدد سے جاں بحق ہوگئی ۔

معصوم بچی کےجسم پر تشدد کی ویڈیوز سوشل میڈیا پر وائرل ہوگئی، وائرل ویڈیوز میں مبینہ تشدد کے واضح نشانات دیکھے جاسکتے ہیں۔

معصوم بچی جہاں ملازمت کرتی تھی وہاں تڑپنےکی ویڈیو بھی سامنے آگئی ہے، 10 سال کی بچی بااثر شخصیت کےگھر پر ملازمہ تھی تاہم بغیرپوسٹ مارٹم بچی کی فوری تدفین کئی سوالات کو جنم دینے لگی۔

ویڈیو میں جسم پر تشددکےواضح نشانات کے باوجود والدین بھی طبعی موت قرار دینےلگے ہیں۔

 پولیس کا کہنا ہے کہ والدین کے مطابق بچی کی موت تشدد سے نہیں بلکہ طبعی تھی۔

والدین نے مؤقف میں کہا کہ غریب لوگ ہیں، بچی کو ملازمت کیلئے بھیجا تھا لیکن تشدد نہیں کیاگیا، فون آیا کہ بچی کی موت ہوگئی ہے آکر میت لے جاؤ۔

پولیس کا کہنا ہے کہ بچی کی موت جس گھر میں ہوئی ان سے رابطےکی کوشش کی گئی مگر مؤقف دینےسےانکار کر دیا گیا۔

ایس ایس پی خیرپور نے رانی پور میں 10 سالہ گھریلوملازمہ کے جاں بحق ہونے کا نوٹس لیتے ہوئے اے ایس پی گمبٹ نعمان ظفر کو انکوائری آفیسر مقررکردیا۔

ایس ایس پی خیرپور کے احکامات پر اے ایس پی ،ایس ایچ او رانی پور نے لواحقین سے ملاقات کی اور بتایا کہ معاملےکی تمام پہلوؤں سے انکوائری کر رہے ہیں۔

پولیس کے مطابق بچی کے والدین کابیان ہے کہ بچی کافی عرصے سے بیمار تھی، بعد از انکوائری مزید قانونی کارروائی کی لائی جائے گی۔