پی ٹی آئی کے وائس چیئرمین شاہ محمود قریشی کی غیرقانونی و بلاجواز گرفتاری پر پی ٹی آئی نے شدید مذمت کی ہے۔

تفصیلات کے مطابق ترجمان پی ٹی آئی کا کہنا ہے کہ وائس چیئرمین شاہ محمود قریشی کی گرفتاری قانون کے غلط استعمال، سیاست میں ریاست کی شرانگیز مداخلت اور انسانی حقوق کیخلاف بدترین اقدام ہے، نگران حکومت پی ڈی ایم کی مجرم حکومت کے نقشِ قدم پر چلتے ہوئے لاقانونیت اور فسطائیت کا ایجنڈا آگے بڑھا رہی ہے۔

  ترجمان تحریک انصاف نے کہا کہ امریکہ میں پاکستانی سفیر کے بھجوائے جانے والے خفیہ مراسلے کی تحقیقات کی آڑ میں شاہ محمود قریشی کی گرفتاری کا کوئی جواز نہیں، شاہ محمود قریشی ایف آئی اے کی جے آئی ٹی سے مکمل تعاون کررہے تھے اور 24 جولائی کو باضابطہ پیش ہوئے، شاہ محمود قریشی نے سہ پہر ساڑھے چار بجے کی اپنی پریس کانفرنس میں تحریک انصاف کے ذمہ داران و کارکنان کیخلاف بدترین ریاستی فسطائیت کو قوم کے سامنے بے نقاب کیا تھا، شاہ محمود قریشی کا اصل جرم عمران خان کی قیادت پر غیرمبہم اعتماد کا اظہار ہے، شاہ محمود قریشی نے اعلان کیا کہ عمران خان ہی تحریک انصاف کے چیئرمین تھے، چیئرمین ہیں اور تاحیات چیئرمین رہیں گے، انشاءاللہ۔

  ترجمان تحریک انصاف نے کہا کہ شاہ محمود قریشی نے پارٹی کے متفقہ فیصلے کی روشنی میں ملک میں انتخابات کو نوے روز کی آئینی مدت سے دور دھکیلنے کی کوششوں کی قانونی و سیاسی مزاحمت کا روڈ میپ بھی قوم کے سامنے رکھا، وائس چیئرمین شاہ محمود قریشی کی گرفتاری تحریک انصاف میں قیادت کا فقدان پیدا کرنے اور قیادت و کارکنان کے مابین روابط کو مفلوج بنانے کی مذموم ترین کوشش ہے۔

  ترجمان تحریک انصاف نے کہا کہ پی ٹی آئی عمران خان کی ہدایات اور منظور کردہ خصوصی میکانزم کے تحت پارٹی کی فیصلہ سازی کو معطل کرنے کی مذموم کوششوں کو ناکام بنائیں گے، پاکستان تحریک انصاف چیئرمین عمران خان کے منظور کردہ میکانزم کے تحت آگے بڑھے گی اور قیادت کی رہائی کیلئے بھی اقدامات اٹھائے گی، تحریک انصاف کی قانونی ٹیم وائس چیئرمین شاہ محمود قریشی کی فوری رہائی کیلئے قانونی لائحۂ عمل تیار کرے گی۔

  ترجمان تحریک انصاف نے کہا کہ جبر، لاقانونیت اور فسطائیت کا کوئی حربہ ہمیں حقیقی آزادی، آئین کی بالادستی، قانون کی حکمرانی اور عوام کے ووٹ کے حق کے تحفظ جیسے اہداف کے حصول سے نہیں روک سکتا۔