استحکام پاکستان پارٹی سندھ کے صدر محمود مولوی نے کہا ہے کہ صدر مملکت عارف علوی کے ٹوئٹ کو سمجھنے میں ناکام ہوں۔

تفصیلات کے مطابق استحکام پاکستان پارٹی سندھ کے صدر محمود مولوی نے کہا ہے کہ صدر عارف علوی کا آفیشل سیکرٹ ترمیمی بل اور پاکستان آرمی ترمیمی بل پر دستخط کے حوالے سے بیان سمجھ سے بالاتر ہے، میں صدر مملکت عارف علوی کے ٹوئٹ کو سمجھنے میں ناکام ہوں۔

محمود مولوی نے کہا کہ صدر مملکت کہہ رہے ہیں کہ ان کے اسٹاف نے ان کے دستخط جعلی بنائے؟ اگر ایسا ہے تو کیا وہ آرٹیکل 6 کے تحت اپنے عملے کے خلاف قانونی کارروائی کریں گے؟ انہیں تردید کرنے میں 36 گھنٹے سے زیادہ کا وقت کیوں لگا؟

انہوں نے کہا کہ جب بھی صدر یا گورنر بل کو واپس کرتے ہیں تو وہ پارلیمنٹ کے پاس غور کرنے کے لئے سفارشات کے ساتھ واپس آتا ہے،5 سال تک صدر رہنے کے بعد کیا انہوں نے کبھی کوئی بل ان کی سفارشات کے بغیر واپس کیا ہے؟ یہ حیران کن ہے کہ صدر نے بل کو بغیر کسی سفارشات کے اختلاف کرتے ہوئے واپس کردیا۔

استحکام پاکستان پارٹی سندھ کے صدر محمود مولوی نے کہا کہ آئین کے آرٹیکل 75 کے مطابق جب کوئی بل منظوری کے لیے بھیجا جاتا ہے تو صدر کے پاس دو اختیارات ہوتے ہیں، یا تو منظوری دیں، یا مخصوص سفارشات کے ساتھ معاملہ پارلیمنٹ کو بھیجیں، آرٹیکل 75 کوئی تیسرا آپشن فراہم نہیں کرتا۔

واضح رہے کہ صدر مملکت ڈاکٹر عارف علوی کا کہنا ہے کہ میرا خدا گواہ ہے، میں نے آفیشل سیکرٹس ترمیمی بل 2023 اور پاکستان آرمی ترمیمی بل 2023 پر دستخط نہیں کیے۔

سماجی رابطے کی ویب سائٹ ایکس (سابقہ ٹوئٹر) پر صدر عارف علوی نے آفیشل سیکریٹ ایکٹ اور پاکستان آرمی ایکٹ ترمیمی بل سے متعلق بتایا کہ میں ان قوانین سے متفق نہیں تھا۔

انہوں نے کہا کہ میں نے اپنے عملے سے کہا کہ وہ بغیر دستخط شدہ بلوں کو مقررہ وقت کے اندر واپس کر دیں تاکہ انہیں غیر موثر بنایا جا سکے۔

صدر مملکت نے کہا کہ میں نے ان سے کئی بار تصدیق کی کہ آیا وہ واپس آچکے ہیں، تاہم مجھے آج پتہ چلا ہے کہ میرے عملے نے میری مرضی اور حکم کی خلاف ورزی کی۔

عارف علوی نے مزید کہا کہ جیسا کہ اللہ سب جانتا ہے اور وہ معاف کر دے گا، میں ان لوگوں سے معافی مانگتا ہوں جو اثر انداز ہوں گے۔

خیال رہے کہ گزشتہ روز یہ خبر سامنے آئی تھی کہ صدر مملکت عارف علوی نے  آفیشل سیکریٹ ایکٹ اور آرمی ایکٹ ترمیمی بل پر دستخط کر دیے ہیں جس کے بعد دونوں بلز قوانین بن گئے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔