افغانستان کے دارالحکومت میں برسی کی تقریب کے دوران  مسلح افراد کے حملے میں 27 افراد جاں بحق ہوگئے۔

غیر ملکی خبر رساں ادارے کے مطابق افغان دارالحکومت کابل میں حزب وحدت پارٹی کے رہنما عبدالعلی مزاری کی 25 ویں برسی کی تقریب کے دوران  مسلح افراد نے حملہ کردیا۔

وزارت داخلہ کے ترجمان نصرت رحیمی کے مطابق حملے کے نتیجے میں خواتین اور بچوں سمیت 27 افراد جاں بحق جبکہ 29 زخمی ہوگئے ہیں۔

انہوں نے مزید بتایا کہ اسپیشل فورسز نے علاقے کو گھیرے میں لے کر سرچ آپریشن شروع کردیا ہے۔

دوسری جانب وزارت صحت کے ترجمان نظام الدین جلیل   کا کہنا ہے کہ جاں بحق افراد کی تعداد 29  ہےجبکہ 30 افراد زخمی  ہیں۔

ترجمان وزارت داخلہ کےمطابق اس تقریب میں افغانستان کے چیف ایگزیکٹو عبد اللہ عبد اللہ سمیت ملک  کی دیگر سیاسی شخصیات بھی شریک تھیں  جو تمام ہی اس حملے میں محفوظ رہے۔

افغانستان : طالبان کا حملہ، 16 افغان فوجی ہلاک

افغان میڈیا کا کہنا ہےکہ مسلح حملہ آوروں نے تقریب کے مقام کے قریب واقع زیر تعمیر عمارت سے حملہ کیا ۔

افغان طالبان  نے حملے  سے لاتعلقی کا اعلان کیا ہے جبکہ دیگر کسی گروپ کی جانب سے  بھی ابھی تک حملے کی ذمہ داری قبول نہیں کی گئی۔

یہاں یہ بات قابل ذکر ہے کہ گذشتہ سال بھی اس تقریب پر حملہ کیا گیا تھا جس میں 11 افراد جاں بحق ہوئے تھے اور اس کی ذمہ داری داعش سے وابستہ ایک گروپ نے قبول کی تھی۔

واضح رہے کہ اس حملے نے امریکہ اور طالبان کے درمیان 29 فروری کو ہونے والے معاہدے کے تحت 14 ماہ میں تمام غیر ملکی افواج کے افغانستان  سے انخلاء    کو دھچکا لگا ہے۔