صارفین کی عمر تبدیل کر کے دکھانے والی مشہور اپیلیکشن فیس ایب سے متعلق خوفناک سیکیورٹی خدشات سامنے آگئے۔

خبر رساں ادارے کے مطابق فیس ایپ کے ذریعے کمپنی کو دنیا بھر سےتقریباً 15 کروڑ لوگوں کی تصاویر کے ڈیٹا تک رسائی حاصل ہوگئی ہے۔

فیس ایپ روسی کمپنی کی زیرملکیت موبائل ایپلیکشن ہے جو اب 121 ممالک میں سب سے زیادہ ڈاؤن لوڈ ہونے والی ایپ بن گئی ہیں۔

امریکا سے تعلق رکھنے والے ماہرین نے صارفین کو خبردار کیا ہے کہ وہ فیس ایپ استعمال نہ کریں کیونکہ اُن کی تصاویر کو جب چاہیے کسی بھی مقصد کے لیے استعمال کیاجاسکتا ہے۔

دوسری جانب فیس ایپ کمپنی کے ترجمان نے صارف کا ڈیٹا فروخت کرنے یا اُسے کسی بھی مقصد کے لیے استعمال کرنے کی تردید کرتے ہوئے کہا ہے کہ صارفین ایپ میں لاگ ان ہوتے ہیں جس کے بعد ہمارے پاس کسی ایسے ڈیٹا کی رسائی نہیں جو شناخت کو ظاہر کرے۔

ترجمان کے مطابق کسی بھی صارف کی تصویر 48 گھنٹے بعد سسٹم خودبہ خود حذف کردیتا ہے۔

ترجمان کا مزید کہنا تھا کہ کمپنی روس میں قائم ضرور ہے مگر حکومت کو ڈیٹا تک رسائی حاصل نہیں۔

واضح رہے کہ دنیا بھر کے فنکار’ فیس ایپ‘ کا استعمال کرتے ہوئے خود پہ بڑھاپا طاری کرچکے ہیں اور ان دنوں فیس ایپ انتہائی مقبول ہے، ہالی وڈ اور بالی وڈ شخصیات بھی اپنی بڑھاپے کی تصاویر سوشل میڈیا پر شیئر کررہے ہیں۔