پاکستان کے عمرہ زائرین کیلئے سعودی عرب سے بڑی خوشخبری آگئی ہے۔

تفصیلات کے مطابق سعودی عرب نے پاکستان کے عمرہ زائرین کے لیے ویزے کی مدت اب 30 سے بڑھا کر 90 دن کر دی ہے۔

ویزے کے اجرا کو آسان بناتے ہوئے اب 24 گھنٹوں کے اندر ویزا جاری کیا جا سکتا ہے۔

سعودی وزیر حج و عمرہ ڈاکٹر توفیق الربیعہ چار روزہ سرکاری دورے پر 20 اگست کو اسلام آباد پہنچے تھے اور وفاقی دارالحکومت میں اعلیٰ سطح کی ملاقاتوں کے بعد منگل کو کراچی پہنچے جہاں انہوں نے صحافیوں سے گفتگو میں کہا کہ سعودی حکومت کے وژن 2023 کے تحت حج اور عمرہ زائرین کے لیے سہولتوں کو بہتر بنانا ہے۔

انہوں نے کہا کہ اب عمرہ کی غرض سے سعودی عرب آنے والے زائرین ملک کے کسی بھی شہر جا سکتے ہیں۔

ان کا کہنا تھا کہ اب عمرہ ویزا پر آنے والا کوئی بھی شخص مکہ اور مدینہ کے ساتھ سعودی عرب کے کسی بھی شہر میں جا سکتا ہے، مثال کے طور پر وہ ریاض، دمام اور دیگر شہروں کا دورہ کر سکتا ہے۔

سعودی وزیر کے مطابق نئی پالیسی کے تحت خواتین بغیر کسی مرد سرپرست (محرم) کے مملکت میں آ سکتی ہیں۔

انہوں نے کہا کہ ہم نے ٹرانزٹ ویزا بھی شروع کیا ہے جو سعودی عرب کے راستے سفر کرنے اور مملکت میں چار دن تک قیام کی اجازت دیتا ہے اور ایئر لائنز خاص طور پر سعودی ایئر لائن ایک رات مفت قیام بھی فراہم کرے گی۔ جبکہ اس کے علاوہ ٹکٹ اور ویزا بھی ایک ساتھ جاری کیا جائے گا۔

ان کا کہنا تھا کہ مکہ اور مدینہ میں بہت سے مقدس اور تاریخی مقامات ہیں جنہیں ملک میں آنے والوں کے لیے کھولا جا رہا ہے۔

سعودی وزیر حج و عمرہ ڈاکٹر توفیق الربیعہ ملک بھر میں بہت سے تاریخی مقامات ہیں جیسے کہ غار حرا، جبلِ طور، جنگ احد کا مقام اور دیگر مقامات ہر کوئی دیکھنا پسند کرتا ہے اور ہمارے پاس 100 سے زائد ایسے مقامات ہیں جہاں ہم ترقیاتی کام کر رہے ہیں جس سے تاریخی مقامات اور تاریخی ورثے کے دورں میں اضافہ ہو گا۔

انہوں نے کہا کہ سعودی حکومت زائرین کو وہ تمام سہولتیں فراہم کرنے کے خواہاں ہیں جو زیادہ سے زیادہ لوگوں کو متوجہ کر سکیں۔ میرے دورہ پاکستان کے دوران ہم نے سعودی اور پاکستانی ایئر لائنز کے درمیان پروازوں کی تعداد بڑھانے کے لیے ایک معاہدے پر دستخط بھی کیے ہیں۔

ان کا مزید کہنا تھا کہ ایک نئی ایئرلائن کی منظوری بھی دی گئی ہ ےتاکہ کم کرائے والی پروازوں کی تعداد میں اضافہ کیا جا سکے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں