دنیا کے تیز ترین بالر شعیب اختر  کو پاکستان سپر لیگ ( پی ایس ایل ) کے چھٹے ایڈیشن میں لاہور قلندرز کا ہیڈ کوچ بنائے جانے کا امکان ہے۔

تفصیلات کے مطابق سوشل میڈیا پہ گذشتہ  چند روز سے  یہ خبر گردش کررہی ہے   کہ راولپنڈی ایکسپریس کے نام سے مشہور پاکستانی لیجنڈ فاسٹ بالر شعیب اختر  کو پی ایس ایل کی اب تک  کی سب سے ناکام ٹیم  لاہور قلندرز کا  ہیڈ کوچ بنایا  جائے گا۔

یہ خبر اس وقت گردش میں آئی جب لاہور قلندرز کے مالک فواد رانا کے نام سے ایک غیر مصدقہ ٹوئیٹر اکاؤنٹ سے ایک پیغام جاری کیا گیا جس میں کہا گیا کہ شعیب اختر لاہور قلندرز کے کوچ بننے جارہے ہیں۔

Shoaib Akhrar set to be appointed Lahore Qalandars head coach pic.twitter.com/E8TrgHhNpe

Advertisement

— Nadeem Sanwala (@Sanwala786) March 6, 2020

تاہم بول نیوز کی جانب سے جب اس  خبر کی تصدیق کے لیے  لاہور  قلندرز کی مینجمنٹ سے رابطہ کیا گیا تو انہوں نے اس خبر کی تردید کرتے ہوئے  کہا  ٹیم مینجمنٹ کی جانب سے ایسا کوئی فیصلہ نہیں کیا گیا۔

انہوں نے مزید کہا کہ میڈیا  اور شائقین سے گزارش ہے ایسی کسی خبر پہ کان نہ دھریں ، ٹیم مینجمنٹ کی طرف سے اگر ایسا کوئی فیصلہ کیا گیا تو میڈیا کو آگاہ  کردیا جائے گا ۔

واضح رہے کہ لاہور قلندرز کے موجودہ ہیڈ کوچ  سابق ٹیسٹ فاسٹ بالر عاقب جاوید ہیں جو کہ پہلے سیزن سے اس عہدے پر براجمان ہیں۔

لاہور قلندرز کی ٹیم گذشتہ چاروں ایڈیشنز سمیت حالیہ سیزن میں بھی ابھی تک  پوائنٹس ٹیبل پر سب سے نیچے ہے جس کے سبب عاقب جاوید کو مسلسل تنقید کا نشانہ بنایا جاتا ہے۔

گذشتہ دنوں شعیب اختر نے اپنے یوٹیوب چینل پر عاقب جاوید پر  تنقید کرتے ہوئے  لاہور قلندرز کے مالک فواد رانا سے انہیں برطرف  کیے جانے کا مطالبہ کیا  تھا۔

شعیب اختر کا کہنا تھا کہ عاقب جاوید صرف ٹرائلز لینے اور ٹیلنٹ ڈھونڈنے میں اچھے ہیں لیکن انہیں کرکٹ کی سمجھ نہیں ہے۔