اسلام آباد ہائیکورٹ نے ایڈووکیٹ ایمان مزاری کے خلاف ملک بھر میں درج مقدمات سے متعلق سیکرٹری داخلہ سے رپورٹ طلب کرلی۔

تفصیلات کے مطابق اسلام آباد ہائیکورٹ کے جسٹس میاں گل حسن اورنگزیب نے ایڈووکیٹ ایمان مزاری کی اپنے خلاف درج مقدمات کی تفصیل فراہمی درخواست پر سماعت کی۔

شیریں مزاری کی جانب سے وکیل سلمان اکرم راجہ اور قیصر امام عدالت کے سامنے پیش ہوئے۔

وکیل سلمان اکرم راجہ نے عدالت سے کہا کہ ہمیں ایسی درخواست دائر کرنے کی ضرورت نہیں تھی لیکن حالات ہی کچھ ایسے بن چکے ہیں، 2 کیسز میں گرفتاری ہوئی دونوں میں ضمانت پر رہائی ہوئی، اڈیالہ جیل کے باہر سے ایمان مزاری کو تیسرے مقدمے میں گرفتار کر لیا گیا۔

جسٹس میاں گل حسن اورنگزیب نے ریمارکس دیے کہ ہم بڑے مشکل دور سے گزر رہے ہیں، ایمان مزاری اس عدالت میں موجود تھی میں نے کہا اپنی ماں کی زبان کنٹرول کریں، انہوں نے یقین دہانی کرائی پھر انہوں نے اپنی زبان خود کنٹرول نہیں کی۔ 2023 آئین اور عدلیہ پر عملدرآمد کے لحاظ سے تاریک ترین سال ہے۔

وکیل سلمان اکرم راجہ نے کہا کہ اگر کسی نے کوئی جرم کیا ہے تو عدالت اس کو قانون کے مطابق دیکھ سکتی ہے، یہ جو مقدمہ درج کیا گیا یہ بدنیتی پر مبنی ہے۔

اسلام آباد ہائیکورٹ نے سیکرٹری داخلہ کو حکم دیا کہ ایڈووکیٹ ایمان مزاری کے خلاف ملک بھر میں درج مقدمات سے متعلق کل تک رپورٹس طلب کرکے آگاہ کریں۔

عدالت نے آئندہ سماعت تک ایمان مزاری کو گرفتار کر کے اسلام آباد سے باہر لے جانے سے روک دیا اور کہا کہ سیکرٹری داخلہ یقینی بنائیں ایمان مزاری کو گرفتار کرکے اسلام آباد سے باہر نہ لے جایا جائے گا۔

جسٹس حسن اورنگزیب نے کہا کہ سیکرٹری داخلہ تمام صوبوں سے رپورٹ لیکر عدالت کو آگاہ کریں اور ایمان مزاری کے خلاف 20 اگست کے بعد کا کوئی مقدمہ ہے تو اس میں گرفتار نہ کیا جائے۔

اسلام آباد ہائیکورٹ نے کیس کی مزید سماعت کل تک ملتوی کردی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں