جنوبی بھارتی ریاست کیرالہ نے نایاب نیپاہ وائرس سے دو افراد کی ہلاکت کی تصدیق کے بعد الرٹ جاری کیا ہے۔

برطانوی خبر رساں ادارے کی خبر کے مطابق مقامی عہدیداروں نے بتایا کہ نیپاہ وائرس سے ایک موت اس مہینے کے اوائل میں ہوئی تھی جبکہ دوسری 30 اگست کو ریاست کے کوزی کوڈ ضلع میں ہوئی تھی۔

متاثرہ شخص کے دو رشتہ داروں میں بھی وائرس کی تصدیق ہوئی ہے اور وہ اسپتال میں زیر علاج ہیں۔

2018 کے بعد سے کیرالہ میں یہ نیپاہ وبا کی چوتھی لہر ہے۔

ورلڈ ہیلتھ آرگنائزیشن کے مطابق نیپاہ وائرس انفیکشن ایک زونوٹک بیماری ہے جو جنگلی حیات اور چمگادڑ جیسے جانوروں سے انسانوں میں منتقل ہوتی ہے۔

یہ آلودہ کھانے اور متاثرہ شخص کے ساتھ رابطے کے ذریعے بھی منتقل ہوسکتا ہے۔

وائرس سے متاثر ہونے والے افراد میں بعض اوقات کوئی قابل ذکر علامات ظاہر نہیں ہوتی ہیں ، جبکہ دوسروں میں سانس کے شدید مسائل کی علامات ظاہر ہوتی ہیں۔

سنگین صورتوں میں نیپاہ انفیکشن کے نتیجے میں دماغی بخار ہوسکتا ہے جو دماغ کو شدید متاثر کرتی ہے۔

کیرالہ میں اس وائرس سے متاثر ہونے والوں میں اموات کی شرح زیادہ ہے کیونکہ انفیکشن کے علاج کے لئے کوئی دوا یا ویکسین دستیاب نہیں ہے۔ بھارتی ریاست میں علاج علامات اور معاون دیکھ بھال کے انتظام تک محدود ہے.

بھارت کے وزیر صحت منسکھ منڈویا نے منگل کے روز کہا کہ وفاقی حکومت نے صورتحال کا جائزہ لینے اور وبا سے نمٹنے میں ریاستی حکومت کی مدد کرنے کے لئے ماہرین پر مشتمل ایک ٹیم ریاست میں بھیجی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں