نگورنو کاراباخ کے باغیوں کا کہنا ہے کہ وہ اپنے فوجیوں کے انخلاء کے لیے آذربائیجان سے مذاکرات کر رہے ہیں۔

عرب میڈیا کے مطابق نگورنو کاراباخ کے علیحدگی پسندوں نے آج کہا ہے کہ وہ آذربائیجان کی جانب سے دوبارہ کنٹرول حاصل کرنے کے بعد متنازع علاقے سے اپنی افواج کے انخلا پر بات چیت کر رہے ہیں۔

علیحدگی پسندوں نے ایک بیان میں کہا کہ روسی امن دستوں کی سرپرستی میں آذربائیجان کی طرف سے فوجیوں کے انخلا کے عمل کو منظم کرنے اور فوجی جارحیت سے بے گھر ہونے والے شہریوں کی ان کے گھروں کو واپسی کو یقینی بنانے کے لئے بات چیت جاری ہے۔

علیحدگی پسندوں اور آذربائیجان کے حکام نے جمعرات کے روز روس کی ثالثی میں دوبارہ انضمام مذاکرات کا ابتدائی دور منعقد کیا جو جلد ہی دوبارہ ملاقات کے معاہدے کے ساتھ اختتام پذیر ہوا۔

علیحدگی پسندوں نے جنگ بندی کے معاہدے کے حصے کے طور پر ہتھیار ڈالنے کا وعدہ کیا ہے جس کا مقصد نسلی طور پر آرمینیائی علاقے میں آذربائیجان کے ایک روزہ حملے کو ختم کرنا ہے۔

ایک اندازے کے مطابق اس علاقے میں ایک لاکھ 20 ہزار افراد بجلی اور بنیادی سہولیات کی کمی کا شکار ہیں۔

واضح رہے کہ آذربائیجان پر بین الاقوامی دباؤ بڑھ گیا ہے کہ وہ آرمینیا جانے والی خطے کی واحد سڑک کو دوبارہ کھول دے تاکہ رسد اور لوگ اندر اور باہر جا سکیں۔

علیحدگی پسندوں کے بیان میں کہا گیا ہے کہ فریقین نگورنو کاراباخ میں شہریوں کے داخلے اور نکلنے کے طریقہ کار پر بھی تبادلہ خیال کر رہے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں