نگراں وزیرِاعظم انوار الحق کاکڑ اور روسی صدر ولادیمیر پیوٹن کی ملاقات ہوئی ہے۔

تفصیلات کے مطابق نگراں وزیرِاعظم انوار الحق کاکڑ اور روسی صدر ولادیمیر پیوٹن کی ملاقات بیجنگ میں منعقدہ تیسرے بیلٹ اینڈ روڈ فورم کے موقع پر ہوئی جہاں روسی صدر ولادیمیر پیوٹن نے نگراں وزیرِ اعظم انوار الحق کاکڑ کا استقبال کیا۔

ملاقات میں دونوں رہنماؤں نے علاقائی تعاون کے فروغ کیلئے خطے میں روابط کی مضبوطی کی اہمیت پر زور دیا۔

اس موقع پر باہمی دلچسپی کے امور اور علاقائی و بین الاقوامی امور پر بھی گفتگو ہوئی۔

نگراں وزیراعظم اور سری لنکا کے صدر رانیل وکرما سنگھے کی ملاقات

نگراں وزیراعظم انوار الحق کاکڑ اور سری لنکا کے صدر رانیل وکرما سنگھے کی بیجنگ میں ملاقات ہوئی جس میں دونوں نے پاکستان اور سری لنکا کے مابین موجود مضبوط تعلقات اور دونوں ممالک کے عوام کی آپس میں ہم آہنگی کو خوش آئند قرار دیا۔

نگراں وزیرِ اعظم انوار الحق کاکڑ نے خطے کے وسیع تر مفاد میں غربت کے خاتمے، معاشی ترقی و خوشحالی کیلئے تعاون جاری رکھنے اور امن، استحکام و روابط کے فروغ کیلئے تعاون بڑھانے پر زور دیا۔

دونوں رہنماؤں نے پاکستان اور سری لنکا کو درپیش ایک جیسے معاشی چیلنجز کے حوالے سے بھی گفتگو کی، انہوں نے اس بات پر بھی اتفاق کیا کہ دونوں ممالک کے حکام اس حوالے سے ایک دوسرے کے تجربات سے استفادہ کریں گے جس میں خسارے کا شکار سرکاری اداوں کی نجکاری سر فہرست ہے۔

سری لنکا کے صدر رانیل وکرما سنگھے نے نگراں وزیراعظم انوار الحق کاکڑ کا پاکستانی حکومت و عوام کی جانب سے سری لنکا کی عوام کیلئے نیک خواہشات پر شکریہ ادا کیا، دونوں راہنماؤں نے پاکستان اور سری لنکا کے مابین موجود دیرینہ تعلقات کے فروغ اور باہمی دلچسپی کے امور پر تعاون کو بڑھانے پر اتفاق کیا۔

ملاقات کے دوران دونوں راہنماؤں نے غزہ میں فلسطینیوں کو اسرائیلی حملوں کی وجہ سے درپیش مشکلات پر گہری تشویش کا اظہار کیا،  انہوں نے فوری طور پر اسرائیلی جارحیت کے خاتمے، غزہ میں محصور لوگوں تک انسانی مدد پہنچانے کیلئے راہداری کے قیام اور دو ریاستی حل جس کے تحت 1967 میں تفویض کردہ سرحدوں کے ساتھ ایک فلسطینی ریاست جس کا دارالخلافہ القدس شریف ہو، کے قیام کا مطالبہ کیا۔

نگران وزیراعظم انوار الحق کاکڑ کی بیجنگ میں عالمی رہنماؤں سے ملاقاتیں

نگران وزیراعظم انوار الحق کاکڑ نے بیجنگ میں تیسرے بیلٹ اینڈ روڈ فورم کے موقع پر عالمی رہنماؤں سے ملاقاتیں کی ہیں۔

نگران وزیراعظم انوار الحق کاکڑ نے چین کے دارالحکومت بیجنگ میں مصروف دن گزارا، نگران وزیرِ اعظم انوار الحق کاکڑ اور کینیا کے صدر ڈاکٹر ولیم روٹو کی بیجنگ میں ملاقات ہوئی۔

وزیرِ اعظم نے کینیا کے صدر سے پاکستانی صحافی ارشد شریف شہید کے قتل پر گفتگو کی اور اسپیشل جے آئی ٹی کو رپورٹ کو جلد حتمی شکل دینے میں سہولت فراہم کرنے کی درخواست کی۔

دونوں رہنماؤں نے پاکستان اور کینیا کے مابین مختلف شعبوں میں تعاون کے فروغ پر گفتگو کی اور تجارت، سرمایہ کاری، تعلیم اور عوام کے روابط کے حوالے سے تعاون بڑھانے پر اتفاق کیا۔

کینیا کے صدر نے پاکستان کے زرعی اور صحت کے شعبے میں تجربے سے استفادہ حاصل کرنے کی خواہش کا اظہار کیا۔

علاوہ ازیں نگران وزیراعظم انوار الحق کاکڑ اور سری لنکا کے صدر رانیل وکرما سنگھے کی ملاقات ہوئی جس میں دو طرفہ تعلقات اور خطے کی صورتحال پر گفتگو کی گئی۔

دونوں رہنماؤں نے مختلف شعبوں میں تعلقات کے فروغ پر اتفاق کیا۔

نگران وزیرِ اعظم انوار الحق کاکڑ نے چین کے صدر شی جن پنگ کی جانب سے عالمی رہنماؤں کے اعزاز میں دیئے گئے عشائیے میں شرکت کی۔

گریٹ ہال آف پیپلز میں صدر شی جن پنگ اور خاتون اول پینگ لی-یوان نے وزیرِ اعظم کا پرتپاک استقبال کیا، نگران وفاقی کابینہ کے وزراء نے بھی وزیرِ اعظم کے ساتھ عشائیے میں شرکت کی۔

گریٹ ہال آف پیپلز میں منعقدہ عشائیے میں روس، کینیا، ایتھوپیا، منگولیا، ہنگری، سری لنکا سمیت متعدد سربراہان مملکت بھی شریک تھے۔

نگران وزیرِ اعظم نے عشائیے میں شریک دیگر عالمی رہنماؤں سے غیر رسمی ملاقاتیں بھی کیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔