ترجمان دفترخارجہ عائشہ فاروقی نے کہا ہے کہ بھارت میں اقلیتیں غیر محفوظ ہو چکی ہیں،اقوام متحدہ، او آئی سی اور انسانی حقوق کی تنظیموں سمیت عالمی برادری بھارتی حکومت کو امتیازی اور اقلیت مخالف پالیسیوں سے روکیں۔

تفصیلات کے مطابق ترجمان دفتر خارجہ عائشہ فاروقی نے ہفتہ وار بریفنگ دیتے ہوئے اقوام متحدہ، او آئی سی اور انسانی حقوق کی تنظیموں سمیت عالمی برادری پر زور دیا کہ وہ بھارتی حکومت کو امتیازی اور اقلیت مخالف پالیسیوں سے روکنے کیلئے عملی اقدامات اٹھائیں۔

ترجمان دفتر خارجہ نے کہا کہ مقبوضہ کشمیر میں بھارتی لاک ڈاؤن کاآج 221 ویں روزہے، وادی میں مزید 4 کشمیریوں کو شہید کیا گیا ہے، مقبوضہ کشمیر بین الاقوامی طور پر متنازع علاقہ ہے، اقوام متحدہ سلامتی کونسل بار ہا متنازع خطہ قراردےچکی ہے۔

نئی دہلی میں مسلم کش فسادات کے حوالے سے عائشہ فاروقی نے یہ بھی کہا کہ  بھارت میں اقلیتیں بالخصوص مسلمانوں کیخلاف مظالم جاری ہیں،بھارت میں 54 مسلمانوں کا حالیہ ہنگاموں میں قتل کیا گیا ، کسی بی جے پی رہنما یا کارکن نےمسلمانوں پرمظالم پرافسوس نہیں کیا ، ترک صدر،ایرانی سپریم رہنمانےبھی مذمتی بیانات جاری کئے۔

 ترجمان دفترخارجہ نے امریکہ طالبان امن معاہدے کو افغانستان میں امن و استحکام کے قیام میں تاریخی قدم قرار دیتے ہوئے کہا کہ اب یہ انٹرا افغان ڈائیلاگ کی جانب بڑھنے کیلئے اہم موقع ہے۔

عائشہ فاروقی کا کہنا تھا کہ پاکستان نے سہولت کار کا اپنا کردار ادا کیا اور اب افغان عوام اور ان کے نمائندوں کی ذمہ داری ہے کہ وہ اس عمل کو آگے بڑھائیں۔

بھارتی بیانات جاری فیلگ آپریشن کی طرف اشارہ کرتے ہیں، ترجمان دفترخارجہ

عائشہ فاروقی  نے کہا کہ کرونا وائرس ایک وباءکی شکل اختیار کر چکا ہے، تمام سفارتکاروں کو ہدایت کی گئی ہے کہ وہ جس ملک میں ہیں، ان کی ہیلتھ ایڈوائزی پر عمل کریں۔

عائشہ فاروقی نے یہ بھی کہا کہ حکومت کرونا وائرس کے چیلنج سے نمٹنے کےلئے ہر ممکن اقدامات کر رہی ہے، ملک کے اندر اور بیرونی دنیا میں مقیم پاکستان کے شہریوں کے تحفظ کےلئے تمام تر وسائل بروئے کار لائے جائیں گے۔

کرونا کے حوالے سے ترجمان دفترخارجہ عائشہ فاروقی نے مزید کہا کہ کرونا وائرس اب دنیا کے کئی ممالک میں پھیل چکا ہے ، ہر ملک اپنے شہریوں، تارکین وطن کی حفاظت کیلئے اقدامات کر رہے ہیں ، کچھ دنوں کیلئے کابل میں سفارتخانے کے کونسلر سیکشن کو بند کیاگیا ہے۔