پاکستان پیپلزپارٹی (پی پی پی) کی جانب سے آصفہ بھٹو کو  میدان سیاست میں اتارنے کا فیصلہ کیا گیا ہے۔

پیپلزپارٹی ذرائع کے مطابق آصفہ بھٹو آئندہ الیکشن میں حصہ لیں گی، ان کی سیاست میں انٹری خاندان کا متفقہ فیصلہ ہے۔

ذرائع نے بتایا کہ آصفہ بھٹو ٹنڈو اللہ یار کی نشست پر انتخابات میں حصہ لیں گی جبکہ ان کے لئے لاڑکانہ، نوابشاہ، لیاری کے حلقے بھی زیرغور ہیں۔

پیپلزپارٹی ذرائع کا مزید کہنا تھا کہ آصف زرداری آئندہ الیکشن میں اپنے سابقہ حلقے سے حصہ لیں گے جبکہ بلاول بھٹو، فریال تالپور سابقہ حلقوں سے الیکشن لڑیں گے۔

اس سے قبل پلزپارٹی کی جانب سے عام انتخابات میں پنجاب کے ہر حلقے سے امیدوار کھڑا کرنے کا فیصلہ کیا گیا تھا تاہم سابق صدر آصف علی زرداری نے الیکشن کمیشن پر بھرپور اعتماد کا اظہار کرتے ہوئے کہا تھا کہ ملک شفاف انتخابات کی طرف جارہا ہے اور پیپلز پارٹی اس کے لیے پوری طرح تیار ہے، مھجے الیکشن کمیشن پر پورا اعتماد ہے کہ وہ شفاف الیکشن کروائے گا۔

انکا کہنا تھا کہ پیپلز پارٹی واحد جماعت ہے جو ہر طرح کے ماحول میں الیکشن لڑنے کی صلاحیت رکھتی ہے، مجھے پورا یقین ہے کہ 8 فروری کو پیپلز پارٹی ملک کی اکثریتی پارٹی بن کر سامنے آئے گی۔ ملک کا ماحول اس وقت انتخابات کے لیے سازگار ہے اور الیکشن وقت پر ہونے چاہیے۔

واضح رہے کہ الیکشن کمیشن اعلان کر چکا ہے کہ جنوری کے آخری ہفتے میں انتخابات کرائے جائیں گے جبکہ سپریم کورٹ میں 11 فروری کی تاریخ سامنے آئی تاہم صدر سے مشاورت کے بعد 8 فروری کی تاریخ پر اتفاق ہوا۔

قومی اسمبلی اور چاروں صوبائی اسمبلیوں کے انتخابات آٹھ فروری کو کرائے جائیں گے جس کا الیکشن کمیشن کی جانب سے باضابطہ طور پر نوٹیفکیشن بھی جاری کردیا گیا ہے۔

بعدازاں الیکشن کمیشن کی جانب سے عام انتخابات کی تیاریاں جاری ہیں تاہم الیکشن کے اعلان مسلم لیگ ن اور متحدہ قومی موومنٹ پاکستان (ایم کیو ایم) نے 8 فروری کو ہونے والے عام انتخابات مل کر لڑنے کا اعلان کیا جبکہ پیپلز پارٹی نے عام انتخابات میں سولو فلائٹ لینے کا فیصلہ کیا تھا۔