اسلام آباد: مشرق وسطیٰ میں کشیدہ صورتحال کے پیش نظر پاک بحریہ کا بڑا فیصلہ سامنے آگیا ہے۔

ترجمان پاک بحریہ کے مطابق خلیج عدن میں پاکستانی تجارتی جہازوں کو درپیش خطرات سے بچانے کیلئے پاک بحریہ نے پی این ایس طغرل کو تعینات کر دیا ہے۔

ترجمان نے بتایا کہ پی این ایس طغرل کی تعیناتی کا مقصد پاکستانی تجارتی بحری جہازوں کی آمدورفت کی حفاظت کو یقینی بنانا ہے۔

پاک بحریہ کے ترجمان کا کہنا تھا کہ پاک بحریہ کے جنگی بحری جہاز ریجنل میری ٹائم سیکیورٹی پیٹرول پر باقاعدگی سے فرائض انجام دیتے ہیں۔

ترجمان کے مطابق پاک بحریہ سمندر میں امن وامان کے قیام کیلئے کمبائنڈ میری ٹائم فورسز کے تحت بھی کام کرتی ہے۔

پاک بحریہ کے ترجمان نے مزید کہا کہ پاک بحریہ خطے میں بحری امن و امان برقرار رکھنے کے لئے قومی ذمہ داری سے بخوبی آگاہ ہے۔

یاد رہے کہ ہفتے کے روز فلسطینی عسکریت پسند تنظیم حماس کی طرف سے اسرائیل پر کیے جانے والے غیر متوقع اور اچانک حملوں کے بعد سے مشرق وسطیٰ میں صورتحال تشویشناک حد تک کشیدہ ہو گئی ہے۔

گزشتہ کئی سالوں میں حماس کی طرف سے اسرائیل پر ہونے والے سب سے بڑے حملے کے بعد پورے خطے سمیت عالمی سطح پر تشویش بڑھ گئی ہے۔

سات اکتوبر کو ہونے والے حماس کے حملے کے بعد روس نے شدید تشویش کا اظہار کرتے ہوئے فریقین سے فوری جنگ بندی کا مطالبہ کیا تھا۔ ساتھ ہی روس نے تنازعہ مشرق وسطیٰ  کے حل کے لیے بنائے گئے “کوارٹیٹ” یا چار فریقی ثالثی گروپ کو بلاک کرنے کا الزام بھی عائد کیا۔