اسموگ کی صورتحال میں بہتری آنے پر پنجاب حکومت نے وقتی طور پر پابندیاں ختم کرنے کا اعلان کر دیا۔

تفصیلات کے مطابق اسموگ کی صورتحال کے تناظر میں نگراں وزیراعلیٰ پنجاب محسن نقوی کی ہدایت پر پنجاب حکومت نے سموگ کے حوالے سے وقتی طور پر پابندیاں ختم کرنے کا اعلان کر دیا ہے۔

صوبائی وزیر اطلاعات عامر میر نے کہا ہے کہ مارکیٹیں، بازار، ریسٹورنٹس اور کاروباری ادارے کل اور پرسوں معمول کے مطابق کھلیں گے۔

عامر میر نے کہا کہ تعلیمی ادارے تدریسی سرگرمیاں جاری رکھ سکتے ہیں جبکہ جبکہ سرکاری و نجی سکولوں میں موسم سرما کی تعطیلات 18 دسمبر سے شروع ہوں گی۔

صوبائی وزیر اطلاعات عامر میر نے مزید کہا کہ اگلے ہفتے اسموگ کی صورتحال کا دوبارہ جائزہ لیا جائے گا اور صورتحال کے تناظر میں اقدامات تجویز کیے جائیں گے۔

دوسری جانب وزیراعلیٰ پنجاب محسن نقوی کی زیر صدارت کابینہ کمیٹی برائے انسداد اسموگ کا اجلاس ہوا جس میں اسموگ کی موجودہ صورتحال کا جائزہ لیا گیا، ماہرین ماحولیات اور صحت نے اسموگ میں کمی اور اسموگ کے مضر اثرات سے بچانے کے لیے تجاویز پیش کیں۔

محسن نقوی نے اعلان کیا کہ سرکاری تعلیمی ادارے ، مارکیٹیں، بازار اور کاروباری ادارے کل اور پرسوں معمول کے مطابق کھلے رہیں گے۔

نگراں وزیر اعلیٰ پنجاب محسن نقوی نے مزید کہا کہ ریسٹورنٹس اور دیگر بزنس ہاؤسز بھی معمول کے مطابق کھلے رہیں گے، 18 دسمبر سے پنجاب کے تعلیمی اداروں میں موسم سرما کی تعطیلات ہوں گی۔

صوبائی وزراء ایس ایم تنویر، ڈاکٹر جاوید اکرم، منصور قادر،عامر میر، اظفر علی ناصر، ابراہیم حسن مراد، بلال افضل، چیف سیکرٹری، انسپکٹر جنرل پولیس، چیئرمین پلاننگ اینڈ ڈویلپمنٹ بورڈ، ایڈیشنل چیف سیکرٹری داخلہ اور متعلقہ محکموں کے سیکرٹریز اور اعلیٰ حکام نے اجلاس میں شرکت کی۔