مسلم لیگ ن کی سینئر نائب صدر اور چیف آرگنائزر مریم نواز شریف نے کہا ہے کہ جو نواز شریف پر چوری کا الزام لگاتا تھا وہ آج جیل میں سزا کاٹ رہا ہے۔

تفصیلات کے مطابق مریم نواز شریف نے جلالپور جٹاں میں یوتھ کنونشن سے خطاب کرتے ہوئے کہا کہ میں پہلی بار جلالپور جٹاں آئی ہوں، مجھے نہیں پتا تھا کہ جلالپور جٹاں میں اتنا جذبہ ہوگا۔

انہوں نے کہا کہ پاکستان کی تاریخ کا سب سے بڑا اجتماع منعقد کرنے پر آپکو مبارکباد پیش کرتی ہوں، نواز شریف نے میٹرولائن، اورنج لائن اور بندرگاہیں بنائیں۔

ان کا کہنا تھا کہ مخالفین نے کہا تھا کہ نواز شریف اب کبھی واپس نہیں آئے گا، ایسی کونسی جیل ہے جس میں نواز شریف نہیں رہا؟ مخالفین کہتے تھے کہ نواز شریف کی سیاست ختم ہوگئی۔

مریم نواز نے کہا کہ جھوٹے مقدموں کا سامنا کرتے کرتے 7 سال ہوگئے، آج بھی نواز شریف جھوٹے مقدمے میں عدالتوں کے چکر کاٹ رہے ہیں، جو جیل میں سزا کاٹ رہا ہے نواز شریف پر چوری کا الزام لگاتا تھا۔

انہوں نے کہا کہ نواز شریف کے خلاف ایک پھوٹی کوڑی کا ثبوت نہیں لاسکے، نواز شریف نے 11 سال جلا وطنی کاٹی۔

ان کا کہنا تھا کہ جب چوری کا حساب مانگا تو پلاسٹر ٹانگ پر چڑھا کر آگئے، 190 ملین پاؤنڈ کی رقم سربراہ پی ٹی آئی کی جیب میں گئے ہیں، سزا کاٹنے والے کو سزا نواز شریف نے نہیں اسکے اعمال نے دلوائی ہے۔

مریم نواز نے کہا کہ اگر نواز شریف والی لیول پلیئنگ فیلڈ چاہیے تو  لے لو، پاکستان کی کوئی ایسی جیل نہیں جہاں نواز شریف نے سزا نہ کاٹی ہو۔