انڈر 19 ایشیا کپ کے اہم میچ میں پاکستان نے روایتی حریف بھارت کو 8 وکٹوں سے شکست دے دی۔

تفصیلات کے مطابق دبئی کرکٹ اسٹیڈیم میں ہونے والے میچ میں پاکستان نے ٹاس جیت کر بھارت کو پہلے بیٹنگ کی دعوت دی، بھارت نے مقررہ 50 اوورز میں 9 وکٹوں پر 259 رنز بنائے، پاکستان نے مطلوبہ ہدف 2 وکٹوں کے نقصان پر حاصل کر لیا۔

پاکستان کی کامیابی میں اذان اویس کی شاندار بیٹنگ کا اہم کردار تھا جنہوں نے ناقابل شکست 105 رنز بنائے تھے۔

پاکستانی بولرز نے ابتدا سے ہی بھارتی بیٹرز پر دباؤ برقرار رکھا اور 39 کے مجموعی اسکور پر بھارتی اوپنر ارشن کلکرنی پویلین واپس لوٹ گئے تھے، جبکہ دوسرے اوپنر رودر پٹیل صرف ایک رن ہی بنا سکے۔

 بھارت کی جانب سے کپتان اودے سہارن 60 اور سچن دھاس نے 58 رنز بنا کر ٹیم کے اسکور کو 259 تک پہنچایا۔

پاکستان کے محمد ذیشان نے 4 بھارتی بیٹرز کو پویلین کی راہ دکھائی، جبکہ عامر حسن اور عبید شاہ 2،2 کھلاڑیوں کو آؤٹ کیا اور عرفات منہاس نے ایک بھارتی کھلاڑی کا شکار کیا۔

ہدف کے تعاقب میں پاکستانی بیٹرز نے 28 رنز کے مجموعی اسکور پر شمائل حسن کی وکٹ گرنے کے بعد انتہائی پر اعتماد طریقے سے اننگ کو آگے بڑھایا۔

پاکستان کی دوسری وکٹ 138 رنز پر گری جب شاہزیب خان 63 رنز بنا کر آؤٹ ہوئے۔

138 رنز پر دوسری وکٹ گرنے کے بعد پاکستان کے اذان اویس اور کپتان سعد بیگ کے درمیان 125 رنز کی شاندار شراکت نے ٹیم کو فتح دلائی۔

اذان اویس کی شاندار سنچری کے علاوہ کپتان سعد بیگ نے 68 رنز کی اننگ کھیلی اور ناٹ آؤٹ رہے۔

پاکستان نے بھارت کا 259 رنز کا ہدف 47 اوورز میں دو وکٹوں کے نقصان پر حاصل کر لیا۔

پاکستان کے اذان اویس کو 130 گیندوں پر شاندار ناقابل شکست 105 رنز کی اننگ کھیلنے پر میچ کا بہترین کھلاڑی قرار دیا گیا۔