اسلام آباد: بین الاقوامی مالیاتی فنڈ (آئی ایم ایف) نے پیٹرولیم لیوی بڑھانے کی ایک شرط رکھ دی ہے جس کو حکومت پاکستان پورا کرنے کیلئے تیار ہے۔

ذرائع وزارت خزانہ کے مطابق آئندہ مالی سال کے دوران آئی ایم ایف نے پیٹرولیم مصنوعات پر لیوی بڑھانے کی یقین دہانی کرائی ہے، تاہم پٹرولیم مصنوعات پر لیوی ہدف 1065 ارب تک مقرر کیا جائے گا۔

ذرائع نے بتایا کہ رواں مالی سال پیٹرولیم لیوی کا ہدف 869 ارب روپے سے بڑھا کر 918 ارب کیا جا سکتا ہے جبکہ پیٹرولیم لیوی ہدف سے زیادہ وصول ہونے کا امکان ہے۔

وزارت خزانہ کے ذرائع کا کہنا تھا کہ پیٹرولیم مصنوعات کی کھپت بڑھنے سے بھی 918 ارب لیوی کا ہدف حاصل کیا جا سکتا ہے جبکہ فی لیٹر پیٹرولیم مصنوعات پر لیوی بڑھائی جا سکتی ہے۔

ذرائع نے مزید بتایا کہ آئی ایم ایف نے رواں مالی سال کیلئے مزید لیوی بڑھانے کا مطالبہ بھی کیا جبکہ وزارت خزانہ اور آئی ایم ایف ایم ای ایف پی ڈرافٹ میں ہدف بڑھانے پر متفق ہیں۔

واضح رہے کہ 16 دسمبر سے ملک میں پیٹرول کی قیمت میں 13 اور ڈیزل کی قیمت میں 15 روپے فی لٹر کمی کا امکان ہے، تاہم عالمی منڈی میں پیٹرول کی قیمت میں 5.49 ڈالر فی بیرل کی کمی دیکھنے میں آئی ہے۔

پیٹرول کی فی بیرل قیمت 94.95 ڈالر جبکہ ڈیزل کی قیمت 5.13 ڈالر کم ہو کر 100.05 ڈالر کی سطح پر آ چکی ہے۔ حکومت پیٹرولیم مصنوعات کی ممکنہ نئی قیمتوں سے متعلق حتمی فیصلہ 15 دسمبر کو کرے گی جس کا اطلاق 16 دسمبر سے ہوگا۔