صدر پاکستان ڈاکٹر عارف علوی نے کہا ہے کہ جس انداز میں چین کی حکومت اور چینی عوام نے کرونا کے چیلنج کیا مقابلہ کیا ہے وہ قابل تقلید ہے۔

ان خیالات کا اظہار انہوں نے اپنے چینی ہم منصب صدر ژی جن پنگ سے ملاقات میں کیا، ملاقات میں وزیرِ خارجہ شاہ محمود قریشی اور وزیر برائے منصوبہ بندی اسد عمر بھی شریک تھے۔

ملاقات میں صدر مملکت کا کہنا تھا کہ چین کی دور اندیش قیادت اور عزم و حوصلے سے سرشار چینی عوام نے ہر مشکل کا جوانمردی  اور خندہ پیشانی سے مقابلہ کیا ہے۔

اہوں نے کہا کہ چین کی تعمیر و ترقی کا سفر خصوصاً سماجی و معاشی ترقی اور  غربت کے خاتمے کے لئے اقدامات موجودہ  تاریخ کی  ایک سنہری مثال ہے۔

اس موقع پر انہوں نے کہا کہ سی پیک منصوبہ صدر شی جن پنگ اور چینی قیادت کی دور اندیشی اور خطے کی ترقی کے لئے قابل عمل وژن کا عملی نمونہ ہے۔

ان کا مزید کہنا تھا کہ پاکستان میں ٹڈی دل کے چیلنج سے نمٹنے کے لئے چینی حکومت کے تعاون کے مشکور ہیں اور یہ بھی کہ موجودہ حکومت زراعت کے شعبے کی ترقی کے لئے چینی تجربے سے استفادہ کرنا چاہتی ہے۔

پاکستان اور چین ایک دوسرے کے ساتھ کھڑے ہیں، صدر عارف علوی

دوسری جانب صدر مملکت ڈاکٹر عارف علوی نے چین کے وزیر اعظم لی کی چیانگ سے ملاقات میں کورونا وباء کے خلاف چین کے ساتھ مکمل یکجہتی اور پاکستان کی جانب سے حمایت کا اظہار کیا ہے۔

دونوں رہنمائوں کے درمیان ملاقات بیجنگ کے گریٹ ہال میں ہوئی۔

انہوں نے کہا کہ پاکستان چین نے دنیا کو بتایا ہے کہ وہ بقائے باہمی اور عدم مداخلت پر یقین رکھتے ہیں۔

صدر مملکت نے کہا کہ پاکستان نے ہمیشہ مشکل وقت میں چین کا ساتھ دیا ہے اور کورونا وائرس کی وباء سے نمٹنے کے چیلنج میں بھی اس کی حمایت جاری رکھے گا۔

انہوں نے کہا کہ چین نے کورونا وباء کی روک تھام کے لئے مؤثر اقدامات کئے ہیں۔ اس موقع پر چینی وزیر اعظم نے صدر مملکت اور ان کے وفد کا خیر مقدم کرتے ہوئے کہا کہ چین اور پاکستان کی دوستی وقت کے ساتھ مزید مضبوط ہوئی ہے۔