نگران وزیراعظم انوار الحق کاکڑ نے ملک کو ترقی یافتہ ممالک کے برابر لانے کے لیے سائنس اور ٹیکنالوجی کے فروغ پر توجہ دینے کی ضرورت پر زور دیا ہے۔

تفصیلات کے مطابق نگران وزیراعظم انوار الحق کاکڑ نے خیبر پختونخوا میں غلام اسحاق خان انسٹیٹیوٹ آف انجینئرنگ اینڈ ٹیکنالوجی میں طلبہ و طالبات سے خطاب کرتے ہوئے کہا کہ دنیا میں ٹیکنالوجی کی مدد سے ہی ترقی ممکن ہوئی ہے، طلباء کو تسخیر اور دریافت پر توانائی صرف کرنا چاہیے۔

انوار الحق کاکڑ نے کہا کہ اسلام میں حصول علم پر بہت زور دیا گیا ہے، تعلیمی ادارے میرے دل کے قریب ہیں۔

اس موقع پر نگران وزیراعظم نے طلباء کو معیاری تعلیم فراہم کرنے میں غلام اسحاق خان انسٹی ٹیوٹ آف سائنس اینڈ ٹیکنالوجی کی خدمات، انسٹی ٹیوٹ کو ملک کے جدید اداروں میں سے ایک بنانے کے لیے انسٹی ٹیوٹ کے تمام پیشرؤں اور موجودہ فیکلٹی ممبران کی طرف سے کیے گئے عظیم کام کو سراہا۔

انہوں نے کہا کہ پاکستان کو آپ پر فخر ہے اور حکومت سائنس اور ٹیکنالوجی کی تعلیم کے فروغ کے لیے انسٹی ٹیوٹ کے اقدامات کے ساتھ کھڑی رہے گی۔

نگران وزیراعظم نے وفاقی دارالحکومت اسلام آباد اور دیگر صوبوں میں غلام اسحاق خان انسٹی ٹیوٹ آف سائنس اینڈ ٹیکنالوجی کے کیمپسز کے قیام میں ہر ممکن تعاون کی یقین دہانی کرائی اور کہا کہ خواہش ہے کہ ملک بھر میں غلام اسحاق خان انسٹیٹیوٹ آف انجینئرنگ اینڈ ٹیکنالوجی کے کیمپس ہوں۔