قومی کرکٹ ٹیم کے چیف سلیکٹر وہاب ریاض نے احمد شہزاد، عمر اکمل اور شعیب ملک کے مستقبل کے حوالے سے اہم اعلان کردیا۔

پاکستان کرکٹ ٹیم کے چیف سلیکٹر وہاب ریاض نے گزشتہ روز دورہ نیوزی لینڈ کے لیے 17 رکنی قومی اسکواڈ کا اعلان کیا جس میں ڈومیسٹک کرکٹ میں کارکردگی کا مظاہرہ کرنے والے کھلاڑیوں کو بھی شامل کیا گیا۔

اس دوران وہاب ریاض سے سوال کیا گیا کہ دورہ نیوزی لینڈ کے لیے زیادہ تر نوجوان کھلاڑیوں کو موقع دیا گیا ہے، ایسے میں سینئرکھلاڑیوں کا مستقبل کیا ہوگا؟

چیف سلیکٹر نے جواب دیا کہ شعیب ملک اور احمد شہزاد سمیت کسی کھلاڑی پر انٹرنیشنل کرکٹ کے دروازے بند نہیں ہوئے البتہ وہ دوبارہ پرفارم کرکے قومی ٹیم میں جگہ بناسکتے ہیں اور ان کی کارکردگی کو دیکھتے ہوئے سلیکشن کمیٹی ضرور ان کے بارے میں سوچے گی۔

چیف سلیکٹر کے ہمراہ بطور کنسلٹنٹ ذمہ داریاں نبھانے والے سابق وکٹ کیپر بلے باز کامران اکمل بھی موجود تھے جن سے عمر اکمل کے بارے میں سوال کیا گیا تو انہوں نے جواب میں کہا کہ عمر اکمل کارکردگی کی وجہ سے ٹیم میں سلیکٹ ہوگا، میرے بھائی ہونے کی وجہ سے وہ ٹیم میں نہیں آیا تھا اس نے خود کو منوایا تھا۔

ایک اور سوال کے جواب میں وہاب ریاض نے کہا کہ بابراعظم اور محمد رضوان ٹی ٹوئنٹی میں اوپن نہیں کریں گے کیوں کہ اس وقت ہمیں تجربات کی ضرورت ہے تاکہ ہم ورلڈکپ سے پہلے مختلف کمبی نیشن آزماسکیں جب کہ صاحبزادہ فرحان نے اگر ڈومیسٹک کی طرح دورہ نیوزی لینڈ میں بھی اچھی کارکردگی کا مظہارہ کیا تو وہ بھی اوپن کرسکتے ہیں۔