مودی حکومت نے حزب اختلاف کے 141 ارکان پارلیمنٹ کو معطل کردیا ہے جس پر سونیا گاندھی نے کڑی تنقید کا نشانہ بنایا ہے۔

غیر ملکی خبر رساں ادارے کے مطابق کانگریس پارلیمانی پارٹی کی جانب سے پارلیمنٹ کے سینٹرل ہال میں اجلاس منعقد کیا گیا جس میں خطاب کرتے ہوئے سونیا گاندھی نے مودی حکومت پر تنقید کی۔

کانگریس پارلیمانی پارٹی کی صدر سونیا گاندھی نے کہا ’’اپوزیشن کے ارکان نے پارلیمںٹ میں 13 دسمبر کے غیر معمولی واقعہ کے بارے میں لوگ سبھا اور راجیہ سبھا میں وزیر داخلہ کے بیان کا مطالبہ کیا تھا‘‘۔

ان کا کہنا تھا ’’13 دسمبر کو جو کچھ ہوا وہ ناقابل معافی ہے اور اسے درست قرار نہیں جاسکتا جب کہ وزیر اعظم کو قوم سے خطاب کرنے میں 4 دن لگے اور انہوں نے اپنے خیالات کا اظہار پارلیمنٹ سے باہر کیا‘‘۔

یہ بھی پڑھیں: مودی سرکار نے حزب اختلاف کے 141 ارکان پارلیمنٹ کو معطل کر دیا

سونیا گاندھی نے کہا ’’وزیر اعظم نے اس حرکت سے واضح طور پر ایوان اور ملک کے لوگوں کی توہین کی ہے‘‘۔

انہوں نے مزید کہا ’’اس حکومت نے جمہوریت کا گلا گھونٹ دیا ہے، اس سے قبل کبھی پارلیمنٹ کے اتنے اپوزیشن ارکان کو ایوان سے معطل نہیں کیا گیا‘‘۔

یاد رہے کہ مودی سرکار نے پارلیمنٹ میں سیکیورٹی کی خلاف ورزی کے خلاف احتجاج کرنے والے حزب اختلاف کے 141 ارکان پارلیمنٹ کو معطل کر دیا تھا۔

ارکان پارلیمنٹ گذشتہ ہفتے پارلیمنٹ میں سیکیورٹی کی خلاف ورزی کے خلاف احتجاج کر رہے تھے۔

واضح رہے کہ معطل کیے گئے زیادہ تر ارکان کا تعلق بھارت کے حزب اختلاف کی جماعتوں کے  اتحاد سے ہے جو اگلے سال کے عام انتخابات میں نریندر مودی کی بھارتیہ جنتا پارٹی کا مقابلہ کرنے لیے میدان میں ہوں گے۔