ملائیشیا نے غزہ جنگ کے جواب میں اسرائیل کے جھنڈے والے بحری جہازوں پر پابندی عائد کردی ہے۔

عالمی خبر رساں ادارے کی خبر کے مطابق ملائیشیا نے غزہ کی جنگ کے جواب میں اسرائیل کے جھنڈے والے تمام مال بردار جہازوں کو اپنی بندرگاہوں پر لنگر انداز ہونے سے روک دیا ہے۔

ملائشیا نے اسرائیل پر فلسطینیوں کے خلاف قتل عام اور بربریت کے ذریعے بین الاقوامی قوانین کی خلاف ورزی کا الزام بھی عائد کیا ہے۔

ملائیشیا کے وزیر اعظم انور ابراہیم نے کہا کہ اسرائیل کے اقدامات فلسطینیوں کے خلاف جاری قتل عام اور بربریت کے ذریعے بین الاقوامی قوانین کی خلاف ورزی ہیں۔

وزیر اعظم انور ابراہیم نے ایک بیان میں کہا کہ اسرائیل جانے والے بحری جہازوں کو بھی فوری طور پر جنوب مشرقی ایشیائی ملک کی کسی بھی بندرگاہ پر سامان لوڈ کرنے سے روک دیا جائے گا۔

ملائشیا، جہاں تقریبا 60 فیصد آبادی مسلمانوں پر مشتمل ہے، اسرائیل کے ساتھ سفارتی تعلقات برقرار نہیں رکھتا اور اسرائیل فلسطین تنازعے کے دو ریاستی حل کی وکالت کرتا ہے۔

وزیر اعظم کے مطابق ملائیشیا کی حکومت نے اسرائیلی شپنگ کمپنی زیڈ آئی ایم کو ملائیشیا کی کسی بھی بندرگاہ پر لنگر انداز ہونے سے روکنے کا فیصلہ کیا ہے۔

یہ پابندیاں اسرائیل کے ان اقدامات کا جواب ہیں جو بنیادی انسانی اصولوں کو نظر انداز کرتے ہیں اور فلسطینیوں کے خلاف جاری قتل عام اور بربریت کے ذریعے بین الاقوامی قوانین کی خلاف ورزی کرتے ہیں۔

ملائشیا نے یہ بھی فیصلہ کیا ہے کہ وہ اسرائیل کے جھنڈے کا استعمال کرنے والے بحری جہازوں کو ملک میں لنگر انداز ہونے کے لیے قبول نہیں کرے گا اور اسرائیل جانے والے کسی بھی جہاز پر ملائیشیا کی بندرگاہوں پر سامان لادنے پر پابندی عائد کر دے گا۔

وزیر اعظم انور ابراہیم کا کہنا ہے کہ یہ دونوں پابندیاں فوری طور پر نافذ العمل ہیں۔