یمن کے حوثی رہنما نے بحیرہ احمر میں امریکہ کے جنگی جہازوں پر حملے کرنے کی دھمکی دے دی ہے۔

خلیجی خبر رساں ادارے کی خبر کے مطابق یمن کے حوثی باغیوں کے سربراہ عبدالمالک الحوثی نے خبردار کیا ہے کہ اگر ایران کے حمایت یافتہ گروپ کو واشنگٹن نے نشانہ بنایا تو وہ امریکی جنگی جہازوں پر حملے کریں گے۔

واضح رہے کہ امریکہ نے رواں ہفتے بحیرہ احمر میں تجارتی جہازوں پر حوثیوں کے حملوں کا مقابلہ کرنے کے لیے ایک کثیر القومی فورس قائم کی تھی۔

حوثی رہنما عبدالمالک نے کہا کہ امریکہ کو افغانستان اور ویتنام میں جو کچھ برداشت کرنا پڑا اس سے بھی زیادہ سخت حالات کا سامنا کرنا پڑے گا۔

کئی سالوں کی جنگ کے بعد یمن کے وسیع علاقے پر قابض حوثی باغیوں نے گذشتہ ماہ سے بحیرہ احمر سے گزرنے والے بین الاقوامی بحری جہازوں پر ڈرون اور میزائل داغے ہیں۔

امریکہ کی قیادت میں ہونے والے اس سکیورٹی اقدام میں واشنگٹن اور دس دیگر نیٹو ممالک بحیرہ احمر میں گشت کریں گے تاکہ مستقبل میں حوثیوں کے حملوں کو روکا جا سکے اور ان کا جواب دیا جا سکے۔

عبدالملک الحوثی نے کہا کہ اگر امریکیوں کو مزید کشیدگی پیدا کرنے اور ہمارے ملک کو نشانہ بنا کر یا اس کے خلاف جنگ چھیڑ کر حماقت کرنے کی ترغیب دی گئی تو ہم خاموش نہیں رہیں گے۔

حوثی رہنما نے ٹیلی ویژن پر نشر ہونے والی ایک تقریر میں کہا کہ ہمارے ملک پر حملہ کیا گیا تو ہم امریکی جنگی جہازوں، مفادات اور نیوی گیشن کو اپنے میزائلوں، ڈرونز اور فوجی کارروائیوں کا ہدف بنائیں گے۔

حوثی باغیوں نے بحیرہ احمر میں اپنے حملوں میں اضافہ کرتے ہوئے اسرائیل جانے والے تمام بحری جہازوں کو نشانہ بنانے کی دھمکی دی ہے اور شپنگ کمپنیوں کو اسرائیلی بندرگاہوں سے نمٹنے کے خلاف متنبہ کیا ہے۔

ان حملوں کی وجہ سے یورپ اور شمالی امریکہ کو نہر سوئز کے ذریعے ایشیا سے ملانے والے ایک اہم تجارتی راستے میں خلل پڑا ہے اور کنٹینر شپنگ کی لاگت میں تیزی سے اضافہ ہوا ہے کیونکہ کمپنیاں متبادل، اکثر طویل راستوں کے ذریعے اپنا سامان بھیجنے کی کوشش کر رہی ہیں۔

حوثی حملوں سے نبٹنے کے لیے برطانیہ، بحرین، کینیڈا، ڈنمارک، فرانس، اٹلی، نیدرلینڈز، ناروے، سیشیلز اور اسپین امریکہ کے ساتھ مل کر جنوبی بحیرہ احمر اور اس سے ملحقہ خلیج عدن میں مشترکہ گشت کریں گے۔