لاہور: پاکستان مسلم لیگ (ن) نے الیکشن کمیشن سے 8 فروری کے انتخابات کی تاریخ تبدیل کیے بغیر الیکشن شیڈول میں ترمیم کا مطالبہ کر دیا۔

تفصیلات کے مطابق مسلم لیگ (ن) نے الیکشن کمیشن کو کاغذات نامزدگی جمع کروانے کی تاریخ میں توسیع کے لئے خط لکھا، تاہم  خط مسلم لیگ ن الیکشن سیل کے سربراہ اسحاق ڈار نے پارٹی قائد کی ہدایت پر لکھا۔

خط کے متن میں کہا گیا کہ کاغذات نامزدگی جمع کروانے کے لئے تین دن ناکافی ہیں، کاغذات نامزدگی پیپر جمع کرنے کے لئے امیدوار کو زیادہ وقت درکار ہے۔

اسحاق ڈار نے خط میں کہا کہ دستاویزات مکمل کرنے کے لیے وقت درکار ہوتا ہے، دستاویزات مکمل نہ ہونے پر کاغذات نامزدگی مسترد ہو جاتے ہیں۔

خط میں کہا گیا کہ امیدوار کو کاغذات کےلئے این او سیز لینے ہوتے ہیں اس لئے وقت میں اضافہ کیا جائے، اگر الیکشن کمیشن کاغذات نامزدگی جمع کروانے کے لئے دو دن کی توسیع کردے تو امیدواروں کو آسانی ہو گی۔

اسحاق ڈار نے خط میں کہا کہ الیکشن کمیشن پولنگ کی تاریخ میں تبدیلی کیے بغیر شیڈول میں ترمیم کر سکتا ہے۔

خط میں اسحاق ڈار کی جانب سے استدعا کی گئی کہ الیکشن کمیشن 8 فروری کی پولنگ کی تاریخ تبدیل کیے بغیر الیکشن شیڈول میں ترمیم کرے۔

واضح رہے کہ عام انتخابات 2024 کے لیے الیکشن پروگرام کا دوسرا مرحلہ شروع ہوچکا ہے جس کے تحت کاغذات نامزدگی وصول کرنے اور جمع کرانے کا سلسلہ جاری ہے، تاہم امیدوار آج شام ساڑھے 4 بجے تک کاغذات نامزدگی جمع کروا سکتے ہیں جبکہ کل کاغذات نامزدگی جمع کرانے کا آخری روز ہوگا۔

 گزشتہ روز تمام ریٹرنگ آفیسرز کے دفاتر میں جمع ہونے والے کاغذات نامزدگی کی تفصیل جاری کردی گئی ہے جس میں بتایا گیا ہے کہ امیدوارواں کی درخواست پر پہلے دن کل 396 کاغذات نامزدگی جاری ہوئے جبکہ کل 214 امیدواروں نے کاغذات نامزدگی حاصل کیے۔

بعدازاں الیکشن کمیشن کا کہنا تھا کہ کاغذات نامزدگی پراعتراضات 3 جنوری تک دائر کیے جا سکیں گے، کاغذات نامزدگی کےخلاف اپیلیں 10 جنوری تک سنی جائیں گی، امیدواروں کی نظر ثانی شدہ فہرست 11 جنوری 2024 کو جاری کی جائے گی۔

 الیکشن کمیشن کے مطابق 13 جنوری کو امیدواروں کو انتخابی نشان الاٹ کیے جائیں گے، ملک بھر میں عام انتخابات کیلئے پولنگ 8 فروری کو ہوگی۔